Skip to content
Кристи Мекормик, американска правничка со долгогодишно искуство во изборните процеси и со работа во американската амбасада во Багдад, е изборот на Доналд Трамп за нова амбасадорка во Македонија. Белата куќа ја испрати номинацијата до Сенатот на 9 ноември. Зад нејзиното име стојат повеќе од три децении работа поврзана со изборите, соработка со првата администрација на Трамп и јавни настапи што предизвикале остри политички реакции во САД. За преземање на амбасадорската функција допрва е потребна потврда од Сенатот.
Иако во номинацијата е наведена како кандидатка од Калифорнија, Мекормик е родена во Конектикат. Во средношколските години се преселила на Лонг Ајленд, а нејзиниот образовен пат вклучувал неколку универзитети пред да дипломира англистика на Универзитетот во Бафало во 1985 година. Правото дошло подоцна, по бракот, мајчинството и работата на Универзитетот Јејл.
Во интервју за универзитетската публикација раскажува дека, кога нејзината ќерка имала околу осум години, решила да го полага приемниот тест за правни студии. Добриот резултат ја охрабрил да ја реализира идејата што ја имала уште како студентка. Подоцна дипломирала право со почести на Универзитетот „Џорџ Мејсон“, денешниот Правен факултет „Антонин Скалија“.
Во нејзината животна приказна има и помалку познат престој во Русија. Во авторски текст објавен од американската Комисија за изборна помош во 2018 година, Мекормик наведува дека во средината на деведесеттите живеела во Сибир. Пишувајќи за американските граѓани што гласаат од странство, се присетува дека и таму, а подоцна и во Ирак, лично се соочила со проблеми при добивањето и испраќањето на гласачкото ливче.
Интересот за политиката започнал уште во детството. Нејзините родители работеле во изборни кампањи, а неа и нејзините браќа и сестри ги вклучувале во адресирање пликови, делење изборен материјал и помагање на донаторски настани. Во 1988 година започнала да регистрира гласачи во Ист Хејвен, Конектикат, а по преселбата во Вирџинија станала помошничка за регистрација на гласачи во округот Јорк.
Нејзината правничка кариера се развивала низ судовите и правосудните институции на Вирџинија. Работела како судска правна соработничка, потоа во канцеларијата на државниот јавен правобранител, а била и дел од правните тимови што ја застапувале Вирџинија пред Врховниот суд на САД. Во 2006 година преминала во Министерството за правда, во одделението што ги спроведува федералните закони за гласање и постапува против изборната дискриминација
Багдад е најзначајниот дел од нејзиното досегашно меѓународно искуство. Во 2009 и 2010 година работела во американската амбасада како виша правна советничка и вршителка на должноста заменик-координаторка за владеење на правото. Како американска експертка за избори ги следела ирачките национални избори, ја советувала изборната комисија и присуствувала на дванаесетдневно пребројување на гласовите. Работела и како врска со регионалната влада на Курдистан и со советниците во тимовите за обнова на провинциите.
За тој период подоцна кажала: „Беше опасно, но адреналинот те турка напред“. Тоа искуство ѝ дало непосреден увид во организирањето избори и градењето институции во средина со сериозни безбедносни ризици
Во Вашингтон, нејзината најдолга функција била во Комисијата за изборна помош, позната како ЕAC. Барак Обама ја номинирал во 2014 година, а Сенатот ја потврдил со едногласна согласност на 16 декември. Таа ја заземала републиканската позиција во двопартиското тело, кое им помага на сојузните држави и локалните власти во изборната администрација. Комисијата работи на стандарди за гласачки системи, нивно тестирање и сертификација, како и на поддршка за изборните службеници.
Мекормик трипати ја предводела комисијата. При преземањето на третото претседавање во 2023 година, меѓу приоритетите ги навела пристапноста за гласачите со попреченост, користењето изборни податоци и замената на застарената опрема. Учествувала и во обновувањето на работата на агенцијата по периодот во кој таа немала комесари.
Нејзиниот јавен ангажман вклучувал и непосредна работа со млади гласачи. Во септември 2024 година се вратила во Бафало, каде што помагала на штанд за регистрација, разговарала со студенти и учествувала на дискусија за изборниот интегритет и дезинформациите. Ги охрабрувала младите да волонтираат во изборниот процес за самите да видат како функционира и така да стекнат доверба во резултатите.
Врската со Трамп е документирана уште во неговиот прв претседателски мандат. На 11 мај 2017 година, Белата куќа ја именувала меѓу првите членови на претседателската комисија за изборен интегритет, предводена од тогашниот потпретседател Мајк Пенс и Крис Кобак. На првиот состанок Мекормик зборувала за точноста на избирачките списоци, спречувањето неправилно гласање и заштитата на правото на глас.
Подоцна, нејзините позиции за изборните правила станале предмет на сериозен спор. На настап во Институтот за политики „Америка на прво место“ на 29 октомври 2025 година, организација блиска до Трамп, тврдела дека на демократите им се потребни отворени граници и гласови од лица без американско државјанство за да ги подобрат изборните резултати.
Четворица демократски сенатори, Алекс Падиља, Џеф Меркли, Адам Шиф и Рон Вајден, побарале да ги повлече изјавите или да поднесе оставка. Во нивното писмо, објавено на официјална сенатска страница, настапот е оценет како ширење неосновани тврдења што ја поткопуваат непристрасноста на комисијата. Американскиот јавен медиум ОПБ, известувајќи за спорот, посочил дека гласањето од лица без право на глас е исклучително ретко.
Во нејзина одбрана застанала конзервативната правна организација „Паблик интерест лигал фаундејшн“. Во април 2026 година таа ја оспорила пријавата за наводен партиски настап на Мекормик и оценила дека постапката претставува политички притисок врз нејзините ставови за изборниот интегритет. Така, дел од нејзиниот професионален углед во САД се градел и низ судирот меѓу поддржувачите на построги изборни правила и организациите што предупредуваат на ограничување на пристапот до гласање.
На 9 јули 2026 година завршил нејзиниот мандат во ЕAC. Според Асошиејтед прес, Трамп ги отстранил двајцата демократски членови, додека Мекормик поднела оставка. Четири месеци подоцна, нејзиното име се најде во амбасадорската номинација за Скопје.
Зошто токму таа? Белата куќа во објавената номинација не дава образложение за изборот. Документираната соработка од 2017 година и нејзините подоцнежни настапи покажуваат поврзаност со политичкиот круг на Трамп. Истовремено, работата во Министерството за правда, изборната администрација и амбасадата во Ирак ѝ обезбедува институционално и меѓународно искуство. Оваа комбинација помага да се разбере нејзиниот профил, но конкретната причина за изборот на Македонија не е јавно наведена.
Номинацијата сега е во сенатска постапка. Мекормик допрва треба да добие потврда за да ја преземе дипломатската мисија. Во објавата од 9 ноември нема изложена програма за нејзината работа во Македонија, ниту датум за пристигнување во Скопје.
