Skip to content
Пратеникот на СДСМ Мартин Костовски на денешната седница на Комисијата за уставни прашања истакна дека ова е првпат нашата иднина да е единствено во наши раце и не смееме сами да ја блокираме нашата иднина и иднината на следните генерации.
Ние, нашите млади, нашите деца, заслужуваат да живеат во земја членка на ЕУ, тука дома во нашата Северна Македонија. Нема да добиеме подобар договор. Ова е апсолутно најдобриот договор што Македонија можеше да го добие. Затоа повторувам ова е историска шанса која не смееме да ја пропуштиме. Нема ново вето, тоа го кажаа и претставниците на ЕУ но и на Бугарија. Тие очекуваат да се исполнат обврските од преговарачката рамка, а понатаму, сите прашања со Бугарија се билатерални прашања , и се билатерална обрска меѓу Македонија и Бугарија. Тоа е договор меѓу двете земји. Тие нема да влијааат на евроинтеграциите. Бугарија како и секоја друга ЕУ земја членка може да изрази мислење или загриженост за одредени реформи, но тоа ќе се однесува на процесот од реформи, не и на билатералните прашања, кажа Костовски.
Тој додаде дека со уставните измени се отвараат кластерите и поглавјата, а понатамошниот европски пат е отворен и зависи само од нас и од спроведените реформи.
Скринингот ќе покаже на кое ниво на подготвеност сме и што точно треба да се направи понатаму. Ние сме свои на своето, Македонци кои зборуваат македонски јазик. Членството во ЕУ е клуч за подобра иднина и отвора врата на безброј можности за граѓаните. Тоа е нашата голема идеја, суштината на нашата посветеност, саможртва и го правиме токму за секој еден кој живее во Северна Македонија. СДСМ е политичка партија која не прави компромис со стратешките интереси на државата.Одлуката која е пред нас е тешка, но државничка одлука, која носи прогрес и просперитет. Како владејачко мнозинство не се плашиме од предизвиците кои носат бенефит за граѓаните, тоа многу пати досега на дело го имаме покажано,така ќе биде и сега. Лесно е да велиш дека не го поддржуваш Договорот од Преспа, а да гласаш Северна Македонија да биде членка на НАТО. Лесно е да бојкотираш референдум и да глумиш патриот, а со самото гласање Северна Македонија да биде членка на НАТО директно го прифаќаш референдумското прашање. Лесно е со шпекулации да будиш чувства кои задираат до секој македонец за македонскиот јазик, а да не дојдеш да гласаш ниту за Договорот со ФРОНТЕКС, прв договор потпишан на македонски јазик со ЕУ. Лесно е со лаги да зборуваш за наводна бугаризација и асимилација а да не дојдеш да гласаш за заклучоците за преговарачката рамка, каде е заштитен целосно македонскиот јазик и македонската посебност во ЕУ или пак да не гласаш за законот за унапредување на македонскиот јазик. Со прст да не мрднеш, а не пак да лобираш или да го поздравиш тоа што Германскиот Бундестаг донесе Резолуција за македонскиот јазик, идентитет и култура., и дополнително тоа да го маргинализираш како небитно исто така е лесно, истакна Костовски.
Тој повтори дека државата мора да оди напред, а неизвесноста да остане зад нас.
Сите ние пратениците, претставници на народот имаме обврска на прво место да ги ставиме граѓаните, да ги ставиме државните, националните и стратешки интереси. Сите ние благодарни на своите предци за жртвите, херојското минато и посветеноста во нивните заложби за создавање на самостојна и суверена држава Македонија, мора да покажеме одговорност пред иднината на татковината. Имаме неповторлива шанса да го продолжиме европскиот пат и да оствариме уште една стратешка цел: членство во ЕУ до 2030 година, нагласи Костовски.
