САД и сојузниците ќе ги користат замрзнатите руски средства, Русија ќе ги прекине дипломатските односи

Администрацијата на американскиот претседател Џо Бајден започна итни преговори со сојузниците за користење на замрзнатите руски средства за воена поддршка на Украина, пишува „Њујорк тајмс“, повикувајќи се на неименувани извори.

Белата куќа, наводно, „сигнализирала“ дека се согласува со користењето на рускиот имот, со оглед на тоа што се повеќе конгресмени се залагаат за закон што ќе го дозволи тоа.

Соединетите Американски Држави вршат притисок врз Велика Британија, Франција, Германија, Италија, Канада и Јапонија да ги претстават своите планови на оваа тема до 24 февруари, кога ќе биде двегодишнината од почетокот на руската инвазија на Украина.

Се уште се разговара за деталите за стратегијата за користење на руските средства, а и натаму не е одлучено дали средствата ќе одат директно во Киев или ќе се користат на други начини.

Според американскиот весник, оваа одлука би можела да ја натера Москва да преговара за крај на војната во Украина.

По почетокот на руската инвазија, Европската унија и земјите од Г7 замрзнаа речиси половина од девизните резерви на Русија – околу 300 милијарди евра. Околу 200 милијарди има во Унијата, најмногу на сметките на белгиски „Еуроклир“, кој на крајот на октомври објави дека во деветте месеци од 2023 година заработил околу три милијарди евра од камати од инвестиции во руски средства кои се под санкции.

Русија, пак, најави дека може да ги прекине дипломатските односи со САД доколку Вашингтон ги конфискува руските средства замрзнати поради конфликтот во Украина, изјави денеска рускиот заменик министер за надворешни работи Сергеј Рјабков, пренесуваат британските медиуми.

-САД не треба да живее во илузијата дека Русија со двете раце се држи до дипломатските односи со оваа земја, рече Рјабков.