ЕП ќе провери дали одлуката на ЕК за доделување европски фондови за Унгарија може да биде укината

– Европскиот парламент денеска усвои резолуција во која наведува дека ќе ја процени можноста за укинување на одлуката на Европската комисија за обезбедување над 10 милијарди евра од буџетот на ЕУ за Унгарија. Документот беше усвоен со 345 гласа „за“, 104 „против“ и 29 воздржани.

Европратениците се длабоко загрижени за натамошното поткопување на демократијата, владеењето на правото и основните права во Унгарија, особено поради неодамна усвоениот закон кој е спореден со рускиот „закон за странски агенти“, се вели во соопштението на ЕП. Европратениците го повикуваат Европскиот совет да процени дали Унгарија извршила „сериозни и трајни прекршувања на европските вредности“ според процедурата според членот 7 од Договорот за ЕУ.

Според нив, одбивањето на унгарскиот премиер Виктор Орбан да го поддржи продолжувањето на помошта од ЕУ за Украина претставува „целосно непочитување и кршење на стратешките интереси на ЕУ и кршење на принципот на искрена соработка“.

ЕП вели дека ќе испита дали треба да се преземат правни дејствија за да се поништи одлуката на ЕК за доделување средства од ЕУ за Будимпешта. Предупредија дека може да се преземат правни и политички мерки доколку ЕК ги прекрши своите обврски за заштита на финансиските интереси на ЕУ.