Skip to content
Компанијата „Мета“, која е сопственик на Фејсбук и Инстаграм, отвора оперативен центар за Европската унија, чија задача ќе биде да се бори против дезинформациите за време на изборите за Европскиот парламент во јуни.
Според новиот Закон за дигитални услуги, онлајн платформите со повеќе од 45 милиони просечни месечни корисници, вклучувајќи ги Фејсбук и ТикТок, се обврзани да преземат мерки против дезинформации и изборни манипулации.
-Центарот на Мета ќе собере внатрешни експерти за да ги идентификуваат потенцијалните закани и да постават конкретни мерки за ублажување во апликациите и технологиите во реално време, наведува на официјалниот блог Марко Панчини, шеф за Европа во компанијата.
Покрај отстранувањето на нелегалната содржина, Мета ќе ја прошири и својата сегашна мрежа од 26 независни организации за проверка на факти кои покриваат 22 јазици со три нови партнери во Бугарија, Франција и Словачка.
Мета, исто така, ќе воведе функции кои корисниците ќе можат да детектираат кога споделуваат содржини генерирани со вештачка интелигенција, во случај да не се класифицираат како дезинформации.
Огласувачите кои прикажуваат реклами поврзани со социјални прашања, избори или политика со Мета, исто така, мора да откријат дали користат фотореалистична слика или видео, или аудио со реален звук, што е создадено или изменето дигитално, вклучително и вештачка интелигенција, во одредени случаи.
„ТикТок“ најави претходно овој месец дека ќе постави изборни центри во апликацијата за секоја од 27-те држави на Унијата, со цел да се намали ширењето на дезинформации во пресрет на изборите. (Центар.мк)
