Skip to content
На 16 и 17 декември, Македонскиот народен театар (МНТ) ќе ја претстави премиерата на „Замисли нов свет“, драма инспирирана од седум текстови и интервјуа на реномираниот драматичар Горан Стефановски. Претставата обработува теми како идентитетот, генерациските јазови и општествените предизвици.
Авторката на драматизацијата е Ана Ристоска-Трпеноска, а режијата е дело на Нела Витошевиќ. Екипата вклучува актери од МНТ и Драмски театар, како и нови млади актери, а по две децении, на сцената се враќа и актерката Верица Недеска.
Претставата е копродукција на МНТ, „Сектор Филм“, и Телеком, поставувајќи пример за алтернативно финансирање во културата.
„Сакавме да го потенцираме влијанието на театарот да создава уникатни и значајни приказни. Избравме сцени од првата и втората фаза на творештвото на Стефановски, кои го прикажуваат неговиот неповторлив талент,“ изјави режисерката Витошевиќ.
В.д. директорот Никола Кимовски додаде дека ваквите проекти покажуваат дека театарот може да се потпре и на самофинансирање, надвор од традиционалната државна поддршка.
