Битиќи до МЕПСО: Како сте планирале 0 мегавати струја од увоз во ноември, а сте купиле 132 гигавати?

„Во месец ноември предвидувањата на МЕПСО биле дека ќе има 0 мегавати часови електрична енергија од увоз затоа што немале потреба. Месецот завршил со 132 гигават часови електрична енергија која што е купена. Прашањето е не може да планирате 0 а да имате 132 гигават часови електрична енергија. Тоа значи дека некаде системот ви чкрипи. Тоа значи дека тие кои се најодговорни само стриктно за тоа треба да одговорат“, истакнува во интервју за Рацин.мк пратеникот и поранешен вицепремиер за економски прашања Фатмир Битиќи.

Тој посочува дека тоа покажува дека нашите енергетски капацитети во суштина не произведуваат онолку колку што би требало да произведуваат и колку што произведуваа кога беше најголемата криза.

„Наспроти тоа ние купуваме електрична енергија затоа што има хаварија овде, има хаварија таму. Јас не зборувам за причините, имаа доволно време за да се справат со сите причини. Гледаме дека има одредени превирања. Но, владата е таа, особено што сега има министерство за енергетика кое требало многу блиску да ги следи состојбите е таа која треба да одговори на граѓаните – Зошто нашите пари денес одат надвор од државата?“, прашува Битиќи

Битиќи оценува дека оваа ситуација го исправа прашањето за резултатите од работата на новооснованото Министерството за енергетика, рударство и минерални суровини.

„Ако кажам јас дека не сум видел резултати, ќе кажат ‘еве го опозиционерот кажува’. Јас сметам дека народот нема видено. Податоците за тоа како се справуваме со енергетската криза се фрапантни“, нагласува Фатмир Битиќи.

Тој вели дека во изминматите 8 месеци не слушнавме кои се наредните среднорочни и долгорочни планови во сегментот на енергетика.

„Беа критичари на сите наши стратешки планови и стратешки проекти за инвестиции во енергетиката некаде 1,2 милијарди од приватни партнери, за ЧЕБРЕН – 1 милијарда, 2,2 милијарди, кои секако ќе ја поставеа нашата држава во мапата на држави на производство на електрична енергија од обновливи извори во која што секако дека нашиот извоз ќе растеше. Знаеме колку беа критичари, ние рековме дека без консензус не можеме да одиме понатаму, но сега не гледаме јасност. Ако тие дојдоа со план да има соодветно министерство треба да ни кажат“, вели Битиќи во интервјуто за Рацин.мк.

Битиќи смета дека во наредниот период Владата ќе има полни раце работа за одговарање пред граѓаните каква иднина ќе креираат, затоа што тоа со ваков почеток не е очигледно дека ќе имаме сјајна иднина ви сферата на енергетиката.