Skip to content
Премиерот Христијан Мицкоски им порача на младите да не ја гледаат Македонија како место од кое мора да заминат за да успеат, туку како држава во која треба да ја градат својата иднина. Пораката ја упати на Регионалната министерска конференција за демографски предизвици во Скопје, каде што беше претставена владината стратегија за демографска отпорност и спречување на иселувањето.
Мицкоски рече дека нискиот наталитет, иселувањето и одливот на млади и образовани луѓе се прашања што не можат да се решат преку ноќ, но дека државата не смее пасивно да ги набљудува овие процеси. Според него, наместо краткорочни мерки, Владата подготвува долгорочна стратегија за демографска отпорност за периодот 2026–2046 година.
Во своето обраќање, премиерот порача дека младите не треба да придонесуваат во туѓи економии, туку да ја градат иднината дома. Тој оцени дека привремената работа во странство, плаќањето даноци во други држави и потоа барањето услуги од домашниот систем не може да биде долгорочно решение за државата.
Според најавите, стратегијата ќе се фокусира на младите, семејствата, образованието, вештините, иновациите, човечкиот капитал и поврзувањето со дијаспората. Владата ја претставува како национална рамка што треба да одговори на демографскиот пад, стареењето на населението и заминувањето на работоспособните луѓе.
Министерот за социјална политика, демографија и млади, Фатмир Лимани, истакна дека демографските предизвици не се проблем само на Македонија, туку и на целиот регион, поради што е потребна заедничка и долгорочна политика. Конференцијата во Скопје е посветена токму на демографската отпорност, миграцијата, стареењето, пазарот на трудот и потребата државите да создадат услови за луѓето да останат и да работат дома.
Пораката на Мицкоски доаѓа во период кога иселувањето на младите одамна не е само статистичко прашање, туку една од најголемите развојни закани за Македонија. Младите заминуваат поради плати, но и поради чувство дека системот не им нуди доволно простор за напредување, сигурност, домување, квалитетно образование, фер конкуренција и институции во кои можат да имаат доверба.
Затоа повикот „не се иселувајте“ ќе има тежина само ако биде проследен со конкретни политики што ќе ја направат таа одлука реална. За млад човек да остане во Македонија не е доволно да му се каже дека треба да ја сака државата. Потребно е да види дека државата му нуди работа со достоинствена плата, фер систем, достапно домување, квалитетни услуги и перспектива што не зависи од партиска книшка или лична врска.