Skip to content
Говорот на омраза, навредите и врсничкото насилство сè почесто се префрлаат на социјалните мрежи, а младите се меѓу најизложените. Македонски Телеком и Фондацијата Телеком за Македонија ја продолжуваат иницијативата за побезбеден дигитален простор, во кој токму младите треба да имаат активна улога во спротивставувањето на омразата.
Кампањата е дел од пошироката платформа #НаправиМесто и од иницијативата „Заедно за интернет без омраза“, развиена во партнерство со УНИЦЕФ. Наместо младите да бидат само публика на кампањата, концептот предвидува тие да учествуваат во создавањето пораки, едукацијата на врсниците и конкретните активности против сајбер-насилството.
Податоците на кои се повикуваат организаторите покажуваат колку е распространет проблемот. Во национална анкета на U-Report, 24 отсто од младите испитаници изјавиле дека барем еднаш се почувствувале небезбедно на интернет во текот на претходната година, а секој трет бил изложен на некаква форма на врсничко онлајн насилство. Најголем дел од случаите се случувале на социјалните мрежи.
Во рамките на иницијативата младите добиваат знаење како да препознаат говор на омраза и сајбер-булинг, како да реагираат кога се сведоци на такво однесување и како да дадат поддршка на жртвите. Дел од кампањите се насочени токму кон менување на улогата на пасивниот набљудувач и охрабрување на младите да реагираат без дополнително да го поттикнуваат конфликтот.
Во февруари годинава деца и адолесценти беа вклучени и во национална иницијатива за врсничко застапување против сајбер-насилството и говорот на омраза, организирана од УНИЦЕФ и Фондацијата Телеком за Македонија во соработка со Сојузот на извидници на Македонија.
Телеком темата ја поврзува и со својата поширока платформа #НаправиМесто, чија основна порака е дека дигиталната поврзаност сама по себе не е доволна ако не е придружена со меѓусебно почитување, разбирање и емпатија.
Иницијативата предвидува младите да продолжат да бидат носители на активностите преку врсничка едукација, кампањи и локални акции со цел создавање побезбеден и похуман простор на интернет.
