Охридско езеро и Крушево добиваат конкуренција: Параглајдери ќе летаат и над Преспанско

Покрај Крушево, како светска дестинација за параглајдинг, и Охрид и Охридско Езеро како атрактивни комерцијални средини, се прават обиди и Баба Планина да се најде на мапата за овој адреналински спорт.

Директорот на Јавната установа Национален парк „Пелистер“, Иванчо Тошевски, изјави дека активно работат на идејата за уредување на полетиште за параглајдери на Баба Планина, со што прелетите ќе бидат над Преспанското Езеро.

„Еден од плановите за 2026 година е создавање услови за полетиште на Баба Планина во делот на Преспа, поточно кај локалитетот Вртушка или местото познато за планинарите како Кодро. Местото бара мали корекции во делот на уредувачки активности и без оштетувања на природата“, рече Тошевски.

Ваквите прелети ќе нудат прекрасен поглед кон Преспанското Езеро, но и поголема безбедност во однос на оние над Пелагонија затоа што ќе се лета над вода.

Ж. З.

Преземено од Редакција https://lap.mk, онлајн медиум на локалните заедници од пелагонискиот регион во РСМ, вклучително на ранливите групи граѓани и граѓанските организации што работат со нив.