Skip to content
Штип од 14 часот е без вода за пиење, откако филтер-станицата беше исклучена поради екстремната заматеност на сировата вода што пристигнува од Хидросистемот „Злетовица“. Проблемот е последица на силното невреме што го зафати пробиштипскиот регион.
Директорот на ЈП „Исар“, Александар Арсовски, на вонредна прес-конференција информираше дека водата што доаѓа од браната „Кнежево“ е со толку висока матност што филтер-станицата во моментов не може безбедно да ја преработува. Поради тоа таа е исклучена од системот, а градот остана без редовно водоснабдување.
Проблемите започнаа уште утрово. ЈП „Исар“ тогаш ги повика граѓаните рационално да ја користат водата, бидејќи прекинот на електричната енергија и штетите од невремето го отежнале работењето на ХС „Злетовица“. Неколку часа подоцна состојбата се влоши и преработката на водата беше целосно прекината.
Од „Исар“ велат дека екипите на претпријатието и на ХС „Злетовица“ работат координирано за нормализирање на состојбата, но засега нема прецизна информација кога водоснабдувањето ќе биде целосно обновено.
Со вода од системот „Злетовица“, покрај Штип, се снабдуваат и други општини во источниот дел на земјата, меѓу кои Пробиштип, Свети Николе и Карбинци, каде исто така се можни проблеми со снабдувањето поради последиците од невремето.
Надлежните апелираат до граѓаните за трпение до стабилизирање на системот и повторно пуштање на филтер-станицата во работа.
