Во зима патеки за скијање, на лето за велосипедизам – Како изгледа „Михајлово“

На планината Кожув, вчера официјално започна со работа новиот ски-центар „Михајлово“. Лоциран на околу 35 километри од Кавадарци, центарот располага со современа ски-стаза, ски-лифт и други неопходни содржини за скијачки рекреации. За посетителите е обезбеден организиран превоз од Кавадарци, со повратен автобуски билет по цена од 280 денари.

Според градоначалникот на Кавадарци, Митко Јанчев, ски-центарот е опремен со ски-лифт со должина од 370 метри и капацитет за 600 лица на час, скијачки појас за 800 лица, снежни топови, заштитна мрежа, хидранти и друга современа опрема. Центарот нуди можности за туристички развој, со потенцијал за изградба на ресторани, хотели и сместувачки капацитети.

„Кожуф е вистински природен благодат за општината и државата. Оваа локација располага со снежна покривка речиси цела зима, а сезоната може дополнително да се продолжи со користење на вештачки снег“, истакна Јанчев, додавајќи дека „Михајлово“ е опремен и за летни активности како велосипедизам и други рекреативни спортови.

Патните правци кон селата Страгово, Бохула, Чемерско, Михајлово и Мрежичко редовно се чистат за безбедно движење на сите посетители.

Со центарот стопанисува спортскиот центар „Јасмин“, додека изградбата е реализирана со донации. Компанијата „ЈА МИ“ од Кавадарци ги изведе теренските работи, додека инвестицијата од 231.660 евра е обезбедена од Комерцијална банка и „Кожувчанка ДОО“, со поддршка од градоначалникот Јанчев.

Ски-центарот „Михајлово“ претставува значителен чекор за развој на зимскиот и авантуристичкиот туризам во регионот, нудејќи нови можности за спорт и рекреација.