Skip to content
Фондациите Отворено општество – Западен Балкан (ФОО-ЗБ), во партнерство со Владата на Косово и во соработка со Владата на Црна Гора во рамките на претседавањето со Берлинскиот процес, го најавуваат Форумот на граѓанското општество и тинк-тенк организациите (CSF) 2026, кој ќе се одржи од 5 до 7 октомври 2026 година во Приштина.
Мотото на Форумот е „Докази, а не ветувања“. Земјите од регионот одамна јавно се обврзаа на интеграција во Европската Унија, демократски реформи и економска конвергенција. Задачата на Форумот е да процени што навистина е исполнето и да понуди конкретни, регионално втемелени препораки за јавни политики. Овие препораки ќе бидат доставени до Самитот на лидерите на Берлинскиот процес во Подгорица на 22 октомври 2026 година.
За Форумот
CSF е официјалната платформа на граѓанското општество во рамките на Берлинскиот процес, воспоставен во 2014 година за унапредување на регионалната соработка, економската интеграција и европската перспектива на Западен Балкан. Од 2015 година, Форумот им овозможува на граѓанските организации и тинк-тенк организациите од целиот регион да формулираат заеднички препораки за политики засновани на докази и да ги презентираат директно пред шефовите на Владите, пред годишниот Самит на лидерите. Изданието за 2026 година е во домаќинство на Владата на Косово, а го организираат Фондациите Отворено општество – Западен Балкан, надоврзувајќи се на нивното претходно водење на CSF Тирана 2023.
Изданието за 2026 година се надоврзува и на работата на Ignita, регионалната платформа на OSF-WB која се залага за проширување на ЕУ и за зголемување на регионалното влијание на Западен Балкан во европските форуми. Ignita е партнер за знаење на тематските работни групи во 2026 година.
Програма
Форумот ќе биде отворен на 5 октомври во Националната библиотека во Приштина. Работните сесии на 6 и 7 октомври ќе се одржат во хотелот „Емералд“.
На Форумот ќе учествуваат граѓански организации и тинк-тенк организации од целиот Западен Балкан, претставници на институциите на ЕУ и на партнерските земји во Берлинскиот процес, како и регионални и меѓународни организации.
Шесте тематски работни групи, кои спроведуваат регионални консултации од јуни 2026 година, ги опфаќаат следниве области:
- Конкурентност и раст: од Заедничкиот регионален пазар до Единствениот пазар
- Дигитална трансформација, вештачка интелигенција и дигитален суверенитет
- Безбедност, отпорност и геополитика
- Граѓански простор и демократизација
- Зелена и одржлива транзиција
- Проширувањето и заедничката европска иднина
