Skip to content
Возачите кои ноќеска се враќаат од Халкидики и Солун кон Македонија треба да сметаат на ново затворање на дел од солунската обиколница. Од 23 часот вечерва до 5 часот утре наутро целосно ќе биде прекинат сообраќајот во правец кон запад, поради продолжувањето на работите на проектот „Flyover“.
Затворањето ќе важи на Источната внатрешна обиколница на Солун, меѓу клучките К10 кај Константинополитика и К9 кај Тумба. Сообраќајот кон запад ќе биде целосно прекинат кај К10, по што возилата ќе се пренасочуваат преку улицата Стагеирити, а потоа преку Григориу Ламбраки и Дијагорa повторно ќе се вклучуваат на обиколницата кај клучката К9.
Ова е правецот што го користат и голем број македонски туристи кои од источниот дел на Солун и Халкидики продолжуваат кон Евзони и граничниот премин Богородица, па во периодот на затворањето се можни дополнителни задржувања низ градската сообраќајна мрежа.
Спротивниот правец, кон источен Солун, аеродромот и краците за Халкидики, ќе остане отворен за сообраќај. Грчката сообраќајна полиција ги повикува возачите да ја следат привремената сигнализација и да бидат внимателни поради пренасочувањето.
Обиколницата во последните месеци повеќепати се затвора во ноќните часови поради изградбата на новиот надземен автопат „Flyover“. Само во јуни, јули и почетокот на август имаше повеќе шестчасовни прекини и пренасочувања на сообраќајот на различни делници.
За македонските туристи кои планираат враќање вечерва, најважниот период е од 23:00 до 05:00 часот, кога треба да се очекува побавно движење и дополнително време за минување низ Солун.
