Skip to content
Повеќе од илјада луѓе протестираа во Измир откако градоначалникот Џемил Тугај премина во владејачката Партија на правдата и развојот – АКП на турскиот претседател Реџеп Таип Ердоган.
Демонстрантите се собраа на Плоштадот на Републиката и бараа оставка од Тугај, кој на локалните избори во 2024 година беше избран како кандидат на опозициската Републиканска народна партија – ЦХП.
На протестот имало засилено полициско присуство, вклучително и единици за разбивање демонстрации и водени топови.
Тугај во средата официјално пристапи во АКП, а партиската значка му ја врачи Ердоган на церемонија во Анкара.
Тој на изборите во март 2024 година освои 48,97 проценти од гласовите, додека кандидатот на АКП, Хамза Даг, доби 37,06 проценти. Разликата изнесувала околу 314.000 гласови.
Тугај ја напушти ЦХП во јуни годинава и неколку месеци ја извршуваше функцијата како независен градоначалник.
Неговото преминување во АКП има силно симболично значење бидејќи Измир со децении е едно од главните упоришта на секуларната и левиот центар опозиција. АКП од своето формирање во 2001 година досега не успеала да ја освои функцијата градоначалник на Измир на избори.
И покрај преминувањето на Тугај, АКП нема мнозинство во градскиот совет. Опозициската Нова партија останува најголемата група со 91 советник, додека АКП има 39.
Опозицијата го обвини владејачкиот блок дека вршел притисок врз Тугај пред неговата одлука. Претставниците на АКП ги отфрлаат обвинувањата, додека Тугај изјави дека одлуката ја донел доброволно и дека очекува подобра соработка меѓу локалната и централната власт.
Неговото преминување доаѓа во период на засилени политички тензии во Турција и истраги против повеќе опозициски градоначалници. Турските власти тврдат дека судските постапки се независни, додека опозицијата ги обвинува властите за политички притисок.
