Турција не го милува 1 Мај, апсења и сила против демонстрантите

Турската полиција приведе неколку десетици демонстранти собрани за да го одбележат Први Мај во Истанбул.

Две групи беа цел на напади во различни области од европскиот дел на градот откако ја објавија својата намера да маршираат до иконскиот плоштад Таксим, симбол на протестите во Турција, кои беа целосно блокирани преку ноќ.

Локалните медиуми, вклучително и опозициската веб-страница Бир Гун, објавија најмалку 57 апсења, објави АФП.

Покрај металните огради поставени околу широк периметар околу централните делови на економскиот дел од градот, беше распоредено и значително полициско присуство.

Во населбата Меџидиекој, каде што се собраа активисти од Марксистичката Народноослободителна партија (ХКП), решени да маршираат до Таксим со скандирањата „САД – убиец, АКП – соучесник“, полицијата употреби солзавец, објавија новинарите.

Во Бешикташ, на Босфорот, целосно опкружен од безбедносните сили, полицијата интервенираше веднаш на секое скандирање, а во некои случаи со сила – демонстрантите беа соборени на земја.

Синдикатите и организациите на граѓанското општество повикаа на учество во демонстрациите под слоганот „Леб, мир, слобода“.

Порано оваа недела, турските власти приведоа десетици луѓе во пресрет на 1 мај, вклучувајќи претставници на медиумите и опозициски кругови.