Астрономски цени за влезниците на фудбалскиот Мундијал, фановите револтирани

Високите цени на билетите за овогодинешното Светско првенство на ФИФА предизвикаа многу критики, а Џани Инфантино, претседателот на ФИФА се шегува дека ако најскапите билети се продадат по таа цена, тој лично ќе им служи на публиката за да „го направи искуството одлично“.

Многу билети за турнирот чинат повеќе од 1.000 долари на официјалната веб-страница на ФИФА, а во април, билетите зад голот за финалето во Њу Џерси би можеле да се купат за астрономски 2,3 милиони долари.

„Ако некои луѓе препродаваат некои билети за финалето за два милиони, тоа не значи дека билетите чинат два милиони, а тоа не значи дека некој ќе ги купи“, тврди Инфантино.

Шефот на светското фудбалско тело неуморно ја брани одлуката за наплаќање високи цени на билетите, за кои вели дека се во согласност со билетите за други големи спортски настани во Америка.

„Во Америка, препродажбата е исто така дозволена, па билетите можат да се продаваат по многу повисока цена“, рече Инфантино на 6 мај, за време на посетата на Глобалната конференција на Институтот Милкен во Беверли Хилс.

„Всушност, иако некои велат дека цените се високи, билетите сепак се препродаваат по уште повисоки цени, понекогаш двојно повеќе.“

„Исто така, имаме 25 проценти попуст на билетите за групната фаза што можат да се купат за помалку од 300 долари“, вели Инфантино.

Тој додава дека цените се споредливи со „универзитетските спортски натпревари“ во Америка и „сепак, ова е Светско првенство“.

ФИФА ги промени правилата на платформата за продажба на билети за натпревари што се играат во Торонто, Канада, бидејќи во таа земја билетите можат да се продаваат само по оригиналната цена дури и при препродажба.

Тоа беше реакција на забраната за препродажба на билети по повисока цена, што ја воведе владата на канадската држава Онтарио како дел од Законот што ги става навивачите на прво место.

Шест натпревари од Светското првенство ќе се играат на стадионот во Торонто.

Билетите за натпреварите на другите 15 стадиони низ Америка и Мексико сè уште може да се купат по повисоки од оригиналната цена.

Светското првенство оваа година ќе биде речиси исклучиво за навивачи со поголем паричник, бидејќи билетите, хотелскиот престој и превозот ќе бидат значително поскапи за време на турнирот.

BBC Sport утврди дека навивачите на Англија ќе мора да потрошат 6.500 фунти (околу 8.850 долари) само за натпреварите од групната фаза на нивната репрезентација.

„Ни јас не би платил толку многу за билет“: Трамп

Американскиот претседател Доналд Трамп рече „ни тој не би платил“ кога беше прашан за потенцијалната цена на билет од 1.000 долари за да го гледа натпреварот помеѓу САД и Парагвај во нивниот прв натпревар од Светското првенство во 2026 година.

Натпреварувањето започнува на 11 јуни, а САД, кои се домаќини на турнирот со Канада и Мексико, го започнуваат турнирот во Лос Анџелес на 12 јуни.

„Не ја знаев таа цена“, изјави Трамп за Њујорк пост кога беше прашан за високата цена на билет за натпреварот САД-Парагвај.

„Секако би сакал да бидам таму, но да бидам искрен, ниту јас не би платил толку многу“, додаде тој.

„Ако луѓето од Квинс и Бруклин и сите луѓе што го сакаат Доналд Трамп не можат да одат на натпреварот, би бил разочаран, но, знаете, во исто време, тоа е неверојатен успех.“

„Би сакал луѓето што гласаа за мене да можат да одат на натпреварите“, додаде тој.