Skip to content
Властите во Бангкок го прогласија целиот главен град на Тајланд за подрачје погодено од катастрофа, откако повеќедневните поројни дождови поплавија улици, домови и деловни објекти.
Прогласувањето се однесува на сите 50 окрузи во градот, а најтешка е состојбата во источните делови и во населбите во близина на каналите. Според локалните власти, во одделни делови од Бангкок за 48 часа наврнале речиси 300 милиметри дожд.
На снимките од поплавените подрачја се гледаат автомобили делумно потопени во вода, додека граѓаните се движат по улици на кои нивото на водата на места достигнува до половината. Гувернерот на Бангкок, Чадчарт Ситипунт, предупреди дека поплавите претставуваат опасност за луѓето и можат да предизвикаат значителна штета врз јавниот и приватниот имот.
На жителите во близина на каналите им е препорачано предметите да ги преместат на повисоки места и да избегнуваат непотребно движење. Градската администрација отвори привремени засолништа, а во справувањето со последиците е вклучена и армијата, која поставува теренски кујни и пунктови за помош.
Главниот аеродром „Суварнабхуми“ продолжува да работи, но патниците се предупредени да тргнат два до три часа порано поради отежнатото движење низ градот. Метеоролошките служби најавуваат нови грмежи и обилни врнежи во текот на викендот
