Skip to content
Американката Криста Пајк (50), која преживеа неуспешна егзекуција со смртоносна инјекција во сојузната држава Тенеси, повторно е свесна и може да зборува, потврдија нејзините адвокати. Таа останува во болница со сериозни повреди, една недела по обидот за извршување на смртната казна.
Пајк на 30 септември примила две дози од лекот пентобарбитал во затворот со максимално обезбедување „Ривербенд“ во Нешвил. Според достапните информации, таа е првата позната личност во САД која преживеала откако ѝ биле администрирани лекови за извршување смртна казна.
„И покрај сите изгледи, Криста Пајк е свесна, зборува и продолжува да добива интензивна медицинска нега“, соопштија нејзините адвокати во вторникот.
Тие наведуваат дека Пајк има сериозни оштетувања на рацете, вклучително и изгореници и плускавци, а и понатаму е врзана со лисици за болничкиот кревет. Нејзината здравствена прогноза останува неизвесна, а лекарите очекуваат долготрајно закрепнување.
Адвокатите се обратија до судот во Нешвил со барање затворските власти да ја зачуваат целокупната документација за неуспешната егзекуција, вклучувајќи ги податоците за употребените лекови, иглите и записниците од постапката.
Медицинските експерти ја разгледуваат можноста интравенските линии да биле неправилно поставени, поради што лекот навлегол во околното ткиво наместо директно во крвотокот.
Од Министерството за правда на Тенеси сметаат дека дополнителна судска наредба за зачувување на доказите не е потребна, бидејќи институциите веќе имаат обврска да ја чуваат документацијата.
Гувернерот на Тенеси, Бил Ли, нареди независна истрага за случајот и ги одложи преостанатите егзекуции предвидени за оваа година. По неуспешното извршување на казната, оставка поднесе и директорот на затворската управа Френк Страда.
Криста Пајк беше осудена на смрт за убиството на 19-годишната Колин Слемер во 1995 година. Во времето на злосторството Пајк имала 18 години. Нејзините адвокати со години бараа преиспитување на казната, наведувајќи дека при судењето не биле соодветно земени предвид околностите од нејзиното детство и психичката состојба.
Барањето за помилување и замена на смртната казна со доживотен затвор беше одбиено непосредно пред закажаната егзекуција.
По неуспешниот обид, нејзините адвокати повторно побараа казната да биде заменета со доживотен затвор без можност за условно ослободување.
