Пет слона се бореа со надојдената река, возрасните не ги напуштија младенчињата

Пет диви слона, меѓу кои три возрасни и две младенчиња, завршиле во силната струја на реката Гагар во индиската сојузна држава Утар Прадеш, откако нивото на водата нагло се зголемило по поплавите во регионот. Возрасните слонови останале покрај младенчињата и се обидувале да ги заштитат додека надојдената вода ги носела кон браната. 

Инцидентот се случил во вторникот наутро во областа Бахраич, каде стадото што излегло од шумата било зафатено од силната струја на речниот систем Геруа Кавријала. Трите возрасни слона и двете младенчиња биле однесени кон браната Чаудари Чаран Синг Гиријапури.

Особено тешко било за младенчињата, кои се бореле да останат над површината во длабоката и брза вода. Возрасните слонови, наместо да се обидат самостојно да стигнат до безбедно место, постојано се движеле покрај нив и се обидувале да ги заштитат од силната струја. 

Сцената предизвикала голема вознемиреност кај луѓето што се нашле во близина на браната. За кратко време се собрале стотици жители кои го следеле обидот на стадото да се избори со надојдената вода.

Кога слоновите стигнале до браната, локалните жители успеале да го насочат стадото кон брегот. По извлекувањето од водата, слоновите биле насочени назад кон шумата. Според надлежните служби, сите пет животни биле спасени. 

Инцидентот се случил во период кога поплавите предизвикаа сериозни проблеми во Непал и поширокиот регион, со нагло зголемување на водостојот на повеќе реки. Силните водни струи погодиле и диви животни чии живеалишта се наоѓаат во близина на речните корита.

Снимката од спасувањето брзо привлече внимание, особено поради сцената во која возрасните слонови остануваат со двете младенчиња додека се борат со силната речна струја.