Skip to content
Руски ракети и дронови во последните месеци погодија објекти поврзани со повеќе големи американски компании во Украина, меѓу кои Coca-Cola, PepsiCo, McDonald’s, Boeing и Mondelez, додека администрацијата на американскиот претседател Доналд Трамп засега јавно не реагира на нападите.
Претседателот на Американската стопанска комора во Украина, Енди Хандер, за CNN изјави дека нападите врз американски компании станале значително почести и подиректни.
Според него, станува збор за американски инвестиции и деловни интереси кои се погодени со руски ракети и беспилотни летала.
На почетокот на септември руски дрон погоди фабрика на Coca-Cola во близина на Киев. Украинскиот претседател Володимир Зеленски тогаш оцени дека нападот претставува јасна порака кон САД, посочувајќи дека Москва знаела дека станува збор за американска компанија.
Подоцна истиот месец беше погоден и магацин што го користи McDonald’s во Киевската област. Компанијата потврди дека објектот на нејзин логистички партнер бил оштетен во напад со дрон на 25 септември.
Поради оштетувањето на логистичкиот центар, дел од рестораните на McDonald’s во Украина привремено работат со намалено мени.
PepsiCo, исто така, потврди дека производствен објект во областа Миколаив бил оштетен во руски напад кон крајот на август. Во тој случај немало жртви.
Меѓу погодените компании се споменуваат и Boeing, Cargill и Mondelez, производителот на Oreo, Milka и други познати брендови.
Американската стопанска комора во Украина оценува дека интензитетот на нападите врз објекти поврзани со американски компании е без преседан во досегашниот тек на војната.
Во исто време, администрацијата на Трамп го зголемува притисокот врз Киев да ги прекине нападите врз руските рафинерии, со образложение дека тие влијаат врз глобалните цени на горивата.
Токму поради тоа, од Американската стопанска комора прашуваат зошто Вашингтон е гласен кога станува збор за украинските удари врз руската енергетска инфраструктура, а нема јавна реакција кога руски напади погодуваат американски компании.
Комората минатиот месец побарала средба со американските претставници Стив Виткоф и Џаред Кушнер за да ги информира за состојбата со американскиот бизнис во Украина, но според CNN, засега не добила одговор.
Дел од компаниите избегнуваат јавно да зборуваат за нападите, поради страв од дополнителни ризици за нивните вработени и објекти.
Од Москва нема потврда дека американските компании намерно се избираат како цели. Руските власти редовно тврдат дека нивните напади се насочени кон воени и инфраструктурни цели, додека Украина обвинува дека сè почесто се погодуваат цивилни и економски објекти.
