САД чекаат одговор од Иран, Велика Британија испраќа разурнувач во регионот

Вашингтон чека одговор од Техеран на најновиот мировен предлог за намалување на американските санкции во замена за прекин на збогатувањето на ураниум. Техеран сè уште го разгледува предлогот од 14 точки. Додека Доналд Трамп повторува дека војната завршува, дипломатската шарада продолжува во Ормутскиот теснец. Велика Британија испраќа разорувач во регионот.

Топката е во дворот на Иран, додека Вашингтон чека сериозна понуда за прекин на огнот од Иран. САД ќе ги ублажат санкциите кон Иран ако го запре збогатувањето на ураниум и го деблокира Ормутскиот теснец. Клучното прашање на преговорите е каде Иран ќе складира околу 400 килограми високо збогатен ураниум, за кој претседателот Трамп инсистира дека треба да ѝ биде предаден на Америка. Исто така, се зборува за тоа дали Техеран ќе може да продолжи со збогатувањето на ураниум.

„Чекам одговор од Техеран на нашиот предлог за официјално завршување на војната меѓу нашите две земји. Потоа ќе има посеопфатни преговори за нуклеарната програма на Иран и други спорни прашања. Ќе видиме како ќе оди сè. Иран повеќе нема армија. Не им останува многу“, вели американскиот претседател Доналд Трамп.

Сè во свое време – рече Техеран. Тој додаде дека доцнењето во одговорот ја одразува техничката сложеност на предложениот договор и потребата од одобрување во повеќе центри на моќ во Техеран.

„Ќе одговориме во соодветно време. Сè уште го разгледуваме најновиот американски предлог за преговори за завршување на конфликтот. Американските рокови и ултиматуми не ни значат ништо. Нема да одговориме на нив“, рече портпаролот на иранското Министерство за надворешни работи, Есмаил Багеи.

Сè е поизвесно дека договорот меѓу Америка и Иран нема да биде сеопфатен, туку ограничен – ќе се однесува, пред сè, на деблокирање на пловидбата низ Хормуз. Америка ја обвинува Русија дека испраќа компоненти за беспилотни летала во Иран преку Каспиското Море, кое се претвора во клучен канал за тајна и отворена трговија.

Британскиот разорувач отплови кон Блискиот Исток за евентуална заштита на бродскиот сообраќај во Ормутскиот теснец. Велика Британија и Франција ги предводат меѓународните напори за договор за воен план за придружба на бродовите низ Ормутскиот теснец – кога условите ќе бидат соодветни.

Израелската армија изврши повеќекратни напади низ Либан, и покрај тринеделниот прекин на огнот, при што загинаа најмалку 18 лица, објави Ал Џезира.

Во исто време, ИДФ издаде наредба за присилна евакуација во девет градови и села во јужен Либан, предупредувајќи дека може да се случат уште напади.

Министерството за надворешни работи на Израел објави дека двајца странски активисти од меѓународната хуманитарна флотила Сумуд, кои беа уапсени на 1 мај додека се обидуваа да достават хуманитарна помош во Појасот Газа, се депортирани.

Саиф Абу Кешек, шпански државјанин од палестинско потекло, и Бразилецот Тијаго Авила беа донесени во Израел на испрашување минатата недела откако нивната флотила беше пресретната од израелската морнарица во меѓународните води покрај Грција.

Израел ги обвини дека се поврзани со Народната конференција за Палестинците во странство (PCPA) – група за која Вашингтон тврди дека „тајно го контролира Хамас“. PCPA е санкционирана од САД и Израел.

„По завршувањето на истрагата, двајца професионални провокатори, Саиф Абу Кешек и Тијаго Авила, беа депортирани од Израел. Израел нема да дозволи никакво кршење на законската поморска блокада на Газа“, соопшти израелското министерство на мрежата X.

Рускиот претседател Владимир Путин изјави дека Москва е подготвена да ги транспортира и складира иранските залихи на збогатен ураниум.

Зборувајќи на прес-конференција во Москва, Путин рече дека Русија транспортирала збогатен ураниум од Иран во 2015 година и е подготвена „да го стори тоа повторно“.

Тој посочи дека сите страни во конфликтот се согласиле да го преместат ураниумот од Иран.

„Но, потоа САД ја заострија својата позиција и побараа ураниумот да се транспортира исклучиво на територијата на САД. Потоа Иран ја заостри својата позиција“, додаде Путин.

Москва ќе остане во контакт и со Вашингтон и со Техеран, рече Путин, додавајќи дека се надева дека конфликтот ќе заврши „што е можно поскоро“.

Немаше непосреден коментар од Иран.

Морнарицата на Корпусот на Исламската револуционерна гарда (ИРГК) се заканува дека ќе ги нападне американските локации на Блискиот Исток и „непријателските бродови“ ако нејзините танкери бидат нападнати, објавија иранските медиуми.

„Секој напад врз ирански танкери и комерцијални бродови ќе резултира со тежок напад врз еден од американските центри во регионот и непријателските бродови“, се вели во соопштението издадено по нападите на САД врз два ирански танкери во Оманскиот Залив.