Skip to content
Американската војска погоди три ирански танкери за сурова нафта, откако Иранската револуционерна гарда истрелала балистички ракети кон два воени брода на САД. По американските удари, Техеран соопшти дека возвратил со напади врз танкери и американски пловила во Ормускиот Теснец, но овие тврдења засега не се независно потврдени.
Американската Централна команда соопшти дека носач на авиони и ракетен разурнувач биле цел на повеќе ирански напади додека патролирале во регионот. Двата брода ги избегнале ракетите, а меѓу американскиот персонал немало повредени. Како одговор, американските сили нападнале три танкери поврзани со Иранската револуционерна гарда.
Според американската војска, танкерот „Дауни“ бил погоден во близина на островот Харг, главниот центар за извоз на иранска нафта, додека „Старк 1“ бил нападнат кај пристаништето Џаск, источно од Ормускиот Теснец.
Американските сили го уништиле и празниот танкер „Кајло“, познат и како „Ноксен“, во Оманскиот Залив. Екипажот претходно добил наредба да го напушти бродот, по што танкерот бил погоден на повеќе места.
Централната команда на САД тврди дека два од танкерите се трајно онеспособени, додека третиот е целосно уништен. Иранските медиуми објавија дека екипажите биле евакуирани.
Вашингтон ги опиша погодените бродови како дел од таканаречената иранска флота во сенка, преку која се извезува нафта и се обезбедуваат средства за Револуционерната гарда и вооружените групи што ги поддржува Техеран.
Командантот на американската Централна команда, адмирал Бред Купер, порача дека нападот треба да биде јасен сигнал до Иран. „Ако пукате кон два наши брода, ќе платите повисока економска цена“, изјави Купер, предупредувајќи дека американската војска може дополнително да ја нападне иранската нафтена флота.
Иранското Министерство за надворешни работи ги нарече американските напади „воено злосторство“ и го обвини Вашингтон дека води воена и економска агресија против земјата.
Иранската револуционерна гарда потоа соопшти дека нападнала три танкери што се движеле по, како што наведе, недозволени рути во Ормускиот Теснец, како и три пловила поврзани со САД.
Во најновото соопштение во неделата, Иран тврдеше и дека погодил американски беспилотен брод кој се обидувал да влезе во Ормускиот Теснец. Американската страна сè уште не ги потврди овие напади.
Претседателот на иранскиот парламент, Мохамад Багер Галибаф, предупреди дека секој следен напад врз иранските интереси ќе добие „побрз, посилен и поболен одговор“.
Иранската морнарица истовремено ги предупреди бродовите во Персискиот Залив и во близина на Ормускиот Теснец да избегнуваат движења што Техеран би можел да ги оцени како сомнителни.
Новата размена на напади претставува опасна ескалација бидејќи воените дејства сè повеќе се насочуваат кон нафтените бродови и трговските рути.
Пред почетокот на конфликтот, околу 90 отсто од иранската сурова нафта се извезувала преку островот Харг. Низ Ормускиот Теснец, пак, минувала приближно една петтина од светското снабдување со нафта.
Американската блокада на иранскиот извоз и ограничувањата што Техеран ги воведе во теснецот веќе го намалија сообраќајот и го зголемија ризикот за комерцијалните бродови. Директните напади врз танкери дополнително ја зголемуваат опасноста за светското снабдување со енергенси.
Сегашниот конфликт започна со американските и израелските напади врз Иран на 28 февруари. Во јуни беше постигнат прелиминарен договор за прекин на огнот, но борбите продолжија со повремени напади, додека преговорите за трајно решение и за иранската нуклеарна програма пропаднаа.
Последната размена на удари доаѓа по околу еден месец релативно затишје. Засега нема независна потврда за сите напади што ги објави Иран, ниту официјален одговор од Вашингтон на тврдењето дека е погоден американски беспилотен брод.
