Skip to content
Американскиот претседател смета дека поголем ризик за САД е да ја загубат технолошката трка со Кина.
Американскиот претседател Доналд Трамп ги отфрли предупредувањата дека неконтролираниот развој на вештачката интелигенција може да го загрози човештвото, оценувајќи дека станува збор за претерани стравувања што нема да се остварат.
Запрашан дали стравува дека ВИ би можела да излезе од човечка контрола, Трамп одговори дека нема таква загриженост. Негов приоритет, како што рече, е Соединетите Американски Држави да останат пред Кина во глобалната технолошка трка.
„Кој ќе победи во вештачката интелигенција, ќе победи“, изјави Трамп за време на престојот во неговиот голф-комплекс во ирското место Дунбег.
Тој оцени дека „многу негативни сили“ шират опасни сценарија за вештачката интелигенција и подоцна на својата социјална мрежа отиде чекор понатаму, нарекувајќи ги повиците за ограничување на технологијата „болен заговор“ против ВИ и центрите за податоци. Според него, постојните американски закони и регулаторни механизми се доволни за справување со можните злоупотреби.
Изјавата доаѓа во момент кога раководители и истражувачи од најголемите компании во индустријата бараат побавно развивање на најмоќните системи и построги безбедносни проверки. Директорот на „Антропик“, Дарио Амодеи, предупреди дека способностите на ВИ напредуваат побрзо од механизмите за нивна контрола.
Неговите повици за поголема претпазливост добија поддршка и од директорот на „ОпенАИ“, Сем Алтман, како и од Илон Маск. Тие бараат независно тестирање на напредните модели и меѓународна координација пред системите да добијат способности што луѓето потешко ќе можат да ги надгледуваат.
Трамп, пак, смета дека забавувањето на развојот би ѝ помогнало на Кина да ги престигне САД. Неговата администрација ја постави вештачката интелигенција меѓу главните двигатели на американската економија, додека дебатата за работните места, центрите за податоци и безбедноста на технологијата станува сè поважна тема пред изборите за Конгресот.
