Skip to content
Претседателот на Украина, Володимир Зеленски, изјави дека е невозможно да се стави крај на војната без претходен прекин на огнот, бидејќи без тоа не може да се отвори патот кон дипломатско решение.
„Без прекин на огнот, војната не може да заврши. Потребен е конкретен резултат што ќе биде сигнал дека едната или другата страна е подготвена да го прекине судирот“, рече Зеленски на прес-конференција по самитот на „Коалицијата на подготвените“ што денеска се одржа во Киев.
Зеленски ја поддржа иницијативата на американскиот претседател Доналд Трамп за безусловен прекин на огнот, оценувајќи дека тоа е „само прашање на време“.
„Сите сме собрани тука за да го координираме ова и да дејствуваме што е можно побрзо, бидејќи секој ден, за жал, расте бројот на жртви во оваа војна“, додаде тој.
На состанокот во Киев присуствуваа францускиот претседател Емануел Макрон, германскиот канцелар Фридрих Мерц, британскиот премиер Кир Стармер и полскиот премиер Доналд Туск. Тие изразија поддршка за планот за 30-дневен прекин на непријателствата во конфликтот меѓу Русија и Украина.
Самитот има за цел да се координира поддршката на меѓународната заедница за оваа иницијатива, која се смета за прв чекор кон поширок мировен процес.
