Skip to content
Во Македонија во текот на изминатото деноноќие се регистрирани вкупно 36 пожари на отворен простор, од кои три и утрово се активни, пет се ставени под контрола, а 28 се целосно изгаснати, информира Центарот за управување со кризи (ЦУК).
Според информацијата на ЦУК, заклучно со 07:30 часот на 8 септември, активни се пожарите во три општини.
Во Општина Струга, пожарот се движи на потегот Буринец – Локов – Селце, каде гори нискостеблеста шума.
Во Општина Македонски Брод има два активни пожари. Едниот е во атарот на село Белица, на месноста Кајорец кон село Брезница, кај репетиторот, каде е зафатена нискостеблеста и мешана шума. Вториот е во село Бенче, каде гори шумски пожар.
Уште пет пожари се водат како пожари под контрола.
Во Општина Кичево пожарот во село Тајмиште, на местото Дарда, е на ниска вегетација. Во Општина Сарај пожарот во село Копаница зафатил нискостеблеста шума и ниска вегетација.
Пожар има и на градската депонија во Делчево, додека во Општина Ново Село, во село Стиник, пожарот зафатил паднати стебла. Во Општина Чучер-Сандево, во село Брест, на месноста Рамно, гори мешана шума.
Во изминатото деноноќие се изгаснати 28 пожари на различни локации низ земјата. Меѓу нив има повеќе интервенции на ниска вегетација, шума, депонии и отпад.
Во Скопје, пожарите на улицата „Брсњачка Буна“ во Шуто Оризари биле предизвикани од запален отпад, додека пожарите во Грачани и Никиштани во Општина Ѓорче Петров зафатиле шума.
Во Струмичко се изгаснати пожари во Еднокуќево, Моноспитово, Ангелци и месноста Софилар, додека во Кичевско интервенции имало во Кнежино, Добреноец и на Влашки Пат.
Пожари биле регистрирани и во Бомово, Дебар; Српци, Могила; Курбиново, Ресен; Алдинци, Крушево; Слупчане, Оризаре и Матејче во Липково; Баново Трло и Ново Село во Куманово; Руѓинце и Орах во Старо Нагоричане.
Во Полошкиот регион се изгаснати пожари во Челопек и Милетино во Брвеница, Порој во Тетово, Печково и Равен во Гостивар, како и во Врапчиште.
Последната интервенција е регистрирана и во Велес, кај црквата „Св. Спас“, каде горело ѓубриште.
Иако најголемиот дел од пожарите се ставени под контрола или изгаснати, три активни пожари, особено оние во шумските подрачја на Струга и Македонски Брод, остануваат причина за зголемено внимание, со оглед на ризикот од нивно проширување.
