Skip to content
Во Албанија (Кучове) денеска свечено ќе се отвори воената база на НАТО со модерна инфраструктура за воените авиони на Алијансата, додека пред неколку дена беа склопени 3-те вооружени беспилотни летала „Бајрактар“, купени во Турција, пренесуваат албанските медиуми.
Русија не сака процесот на дијалог меѓу Косово и Србија да заврши успешно според проектите на Западот, се вели во извештајот објавен на 1 март во Приштина на Косовскиот институт за истражување и развој на политики (КИПРЕД), пренесуваат косовските медиуми.
Ова се дел од темите од денешниот редакциски из бор на ЦИВИЛ Медиа, од албанските медиуми во регионот.
АЛБАНИЈА
НОА: Отворена воздушната база на НАТО во Кучове
Денеска свечено ќе биде отворена воената база на НАТО во Кучове со модерна инфраструктура за воените авиони на Алијансата, додека пред неколку дена беа склопени 3-те вооружени беспилотни летала „Бајрактар“, купени во Турција.
Програмата за инаугурација на базата е раздвижена, а на церемонијата на пречек ќе учествуваат највисоките шефови на албанската држава, како и претставници на НАТО алијансата.
За време на церемонијата ќе има и воздушен спектакл на летање на авиони.
Реконструкцијата на воздухопловната база Кучове започна во јануари 2022 година. Поранешната база од времето на комунизмот, изградена со доброволна работа во 1952 година, за да му служи на Варшавскиот пакт, седум децении подоцна ќе служи за операциите на Атлантската алијанса, пренесе НОА.
Лапси: Се бара укинување на мерката „куќен притвор“, денеска седница во ЃККО за поранешниот премиер Сали Бериша
Во Специјалниот суд денеска ќе се одржи рочиште за поранешниот премиер Сали Бериша, кој побара укинување на мерката „куќен притвор“ што му е изречена од 30 декември 2023 година. се очекува да започне во 11:00 часот.
Во меѓувреме, во вторник во 10.50 часот ќе се суди барањето на Бериша за укинување на мерките „должност за јавување“ и „забрана за заминување во странство“, пренесе Лапси.
КОСОВО
КОХА – КИПРЕД: Русија не сака крај на дијалогот Косово-Србија според проектите на Западот
Русија не сака процесот на дијалог меѓу Косово и Србија да заврши успешно според проектите на Западот, се вели во извештајот објавен на 1 март во Приштина на Косовскиот институт за истражување и развој на политики (КИПРЕД).
Успешното завршување на дијалогот, кој е под посредство на Европската унија и поддржан од Соединетите Држави, ќе го докаже намаленото влијание на Русија во светските работи, се вели во извештајот.
Дијалогот меѓу Косово и Србија, поддржан од ЕУ, започна уште во 2011 година. Целта е нормализирање на односите меѓу двете земји. Косово ја прогласи својата независност во 2008 година и е признаено од 117 земји, но Србија продолжува да го смета за нејзин дел. Според извештајот на КИПРЕД, успешното завршување на овој дијалог би довело до консолидација на државата и државјанството на Косово и регионалната безбедност , додека затворањето на проблемите со Косово би ја поттикнало Србија да се ориентира кон Запад, пренесува Коха.
Епока е Ре: Во Приштина денеска се одржува Конференцијата за сајбер безбедност и приватност
Денеска ќе се одржи 8-то издание на Конференцијата за сајбер безбедност и приватност „Cyber ZERO“.
На отворањето учествуваат министерот за внатрешни работи Џелал Свечла, поранешниот премиер на Црна Гора, Дритан Абазовиќ, како и портпаролката на американската амбасада во Приштина, Кетрин Џад, пренесе Епока е Ре.
КОЛУМНА
Коха Диторе: Подемот на екстремните партии во ЕУ е претеран страв
„Растот на популистичките и екстремистичките партии во ЕУ во пресрет на европските избори не е проблем. Најголем проблем е отстапувањето на традиционалните, левичарски и десничарски и либерални партии од вредностите на кои до сега се залагаа.
Најголема опасност е откажувањето од принципите на централните партии. Што се однесува до Европскиот парламент, дури и во идниот состав ќе има доволно мнозинство за главните традиционални, проевропски партии. И ќе остане поддршка за проширувањето на ЕУ, за Западен Балкан и за Косово исто така..“, пишува авторот Аугустин Палокај во колумната „Подемот на екстремните партии во ЕУ е претеран страв“, објавена во Коха Диторе.
Подготви: Д. Тахири (ЦивилМедиа)
