Француските земјоделци ги блокираат патиштата околу Париз

 Земјоделци денеска го блокираа автопатот А1, еден од главните автопатишта во Франција што го поврзуваат Париз со северниот град Лил, земјите од Бенелукс и Велика Британија, предизвикувајќи километарски сообраќаен метеж.

Тоа е прво поголемо нарушување на сообраќајот предизвикано од протестите во француската престолнина.

Локалните синдикати денеска повикаа да се блокираат патиштата во и околу Париз, со цел да се засили притисокот врз Владата, која земјоделците ја обвинуваат дека не прави доволно за да се справи со ниските цени на храната и прекумерните регулативи.

Француските медиуми објавија дека фармерите утрово ги поставиле првите блокади на патиштата во департманот Есон, јужно од Париз, а за попладне најавени сè уште протести.

Владата соопшти дека ќе ги објави првите итни мерки кои имаат за цел да го намалат незадоволството на земјоделците, а исто така е најавено дека ќе се обрати и францускиот премиер Габриел Атал. Владата не прецизираше кога и каде ќе се обрати Атал, ниту пак какви мерки се предвидени.