Skip to content
Грк обвинет за шпионажа се појави пред суд во Лондон, откако британската антитерористичка полиција го товари дека помагал на странска разузнавачка служба, за која се верува дека е поврзана со Иран, во следење новинар на Iran International, медиум што работи од Велика Британија и е критички настроен кон властите во Техеран.
Станува збор за 46-годишниот Јоанис Ајдинидис, грчки државјанин кој живее во Минхен, Германија. Британската полиција соопшти дека тој бил обвинет на 29 мај според Законот за национална безбедност од 2023 година, по истрага на Counter Terrorism Policing London.
Според обвинението, Ајдинидис двапати патувал во Велика Британија оваа пролет за да врши надзор врз адреси поврзани со новинарот. Обвинителството тврди дека фотографирал домови и регистарски таблички, а во еден од случаите поставил скриена камера во чорап, која можела да испраќа податоци кон лица во странство.
Британските власти наведуваат дека случајот се однесува на таргетирање новинар што работи за Iran International, персиски медиум кој со години е под безбедносен притисок поради критичкото известување за иранскиот режим. Телевизијата во 2023 година привремено ја префрли својата работа во Вашингтон поради закани кон нејзините новинари, а подоцна се врати во Лондон со засилени мерки за безбедност.
Ајдинидис бил уапсен на 16 мај во Западен Сасекс и пренесен во полициска станица во Лондон. Судот во Вестминстер дозволил продолжување на неговиот притвор, а по консултации со обвинителството биле одобрени обвиненијата. На рочиштето тој го потврдил идентитетот преку руски преведувач, но не се изјаснил за вина.
Грчките медиуми објавија дека станува збор за грчки иселеник од Грузија, со грчки пасош и живеалиште во Баварија. Според грчките информации, британските органи веќе комуницираат со грчката Антитерористичка служба, а неговото досие кај грчките власти било без претходни кривични записи.
Британската полиција соопшти дека не се верува оти постои поширока опасност за јавноста во врска со овој случај, но призна дека настанот може да предизвика загриженост кај луѓето што работат во персиски медиуми во Велика Британија. Ајдинидис останува во притвор и треба повторно да се појави пред судот „Олд Бејли“ на 19 јуни.
