Илјадници Словаци протестираа против укинувањето на функцијата специјален обвинител за криминал и корупција

 Неколку илјади луѓе се собраа денеска пред словачкиот парламент за да го изразат своето незадоволство од планот на популистичкиот премиер Роберт Фицо да ја укине функцијата специјален обвинител за тежок криминал и корупција.

Протестот се случи во моментот кога пратениците ја привршуваа расправата за предложените законски измени на Кривичниот законик.

Владејачката коалиција, која има мнозинство во парламентот на Словачка, го одложи финалното гласање до четврток.

Неколку лица поврзани со партијата на премиерот Фицо се соочуваат со корупциски скандали.

Европската унија ги доведе во прашање планираните измени на законот, кои вклучуваат намалување на казните за корупција и значително скратување на рокот на застареност.

Според другите одредби од планот одобрен од коалициската влада на Фицо, злосторствата како што се корупцијата, организираниот криминал и екстремизмот ќе бидат преземени од обвинителите во регионалните канцеларии, кои не се занимаваат со такви злосторства во последните 20 години.

Претседателката на Словачка Сузана Чапутова изјави дека е подготвена да стави вето на тие амандмани и да го изнесе законот пред Уставниот суд на земјата доколку владата успее да го заобиколи нејзиното вето.

Фицо се врати на власт по четврти мандат минатата година, откако неговата левичарска партија победи на парламентарните избори на 30 септември.

Треба да знаете
Moже да ве интересира