Skip to content
Додека температурите во Македонија локално надминуваат 40 степени, а многу топлото време се очекува да продолжи до 2 август, дел од клима-уредите работат без прекин, но тешко ја намалуваат температурата во домот. Тоа не мора веднаш да значи дефект, но млак воздух, вода од внатрешната единица или често исклучување на осигурувачот се знаци што не треба да се игнорираат.
Работниот опсег наведен од производителот не значи дека уредот гарантира 22 степени во собата кога надвор се 40. Одредени модели можат технички да работат и при надворешни температури до 46 степени, но нивната ефикасност зависи од моќноста, изолацијата, големината на просторијата, директното сонце, прозорците и бројот на луѓе во неа.
Клима од 3,5 киловати, позната како „дванаесетка“, може да биде доволна за една добро изолирана соба, но недоволна за цел стан, поткровје или простор со големи стаклени површини. Ако уредот е погрешно димензиониран, ќе работи цел ден без да ја достигне зададената температура.
Пред повикување сервис, треба да се проверат филтрите, режимот на работа и протокот на воздух околу надворешната единица. Валкан филтер го ограничува струењето, ја намалува моќноста на ладење и го принудува компресорот да работи подолго. Нечистотијата околу надворешната единица дополнително го отежнува исфрлањето на топлината.
Поставувањето на 16 степени нема да направи воздухот да излегува постуден или просторијата да се излади побрзо. Уредот само ќе продолжи да работи со максимален капацитет подолго време. За повеќето домови, поставка од 24 до 26 степени, со затворени врати, спуштени ролетни и чисти филтри, е поефикасна и поекономична.
Инвертерската клима не мора постојано да се исклучува. Откако ќе ја достигне температурата, таа ја намалува моќноста и ја одржува просторијата со помала потрошувачка. Но, ако излегува млак воздух, се создава мраз на цевките, се чувствува мирис на изгорено или уредот работи без ефект, треба да се исклучи и да се повика сервис. Причината може да биде недостиг или истекување на разладно средство, замрзнат испарувач, нечист кондензатор или проблем со компресорот.
Водата што излегува од одводното црево надвор е нормална кондензација. Вода што капе од внатрешната единица во собата може да укажува на затнат одвод, нечист филтер, замрзнување или неправилна монтажа.
Клима што просечно троши од 0,7 до 1,2 киловати за 12 часа би потрошила приближно од 8,4 до 14,4 киловат-часови. Само активната електрична енергија би чинела околу 40 до 113 денари дневно во првите три блокови на високата тарифа, без останатите ставки од сметката. Цената зависи од блокот, тарифниот период и реалната работа на компресорот.
Клима-уредот не треба да се приклучува на обичен продолжен кабел или на разводник со повеќе силни потрошувачи. Производителите предупредуваат дека таквото поврзување може да предизвика прегревање, струен удар или пожар. Уредот треба да има правилно димензиониран кабел, заземјување и соодветен осигурувач.
