Skip to content
Пробив во лекувањето на еден од најсмртоносните карциноми е постигнат во нова научна студија која покажува дека експериментална терапија може значително да го продолжи животот на пациенти со напреднат рак на панкреас, кој важи за еден од најагресивните и најтешки за лекување облици на канцер.
Според пишувањето на Euronews Србија, повикувајќи се на меѓународни извештаи и клиничко истражување објавено во САД, нова орална експериментална пилула покажала дека кај дел од пациентите го удвојува времето на преживување во споредба со стандардната хемотерапија. Лекот делува на мутација во протеинот KRAS, кој е присутен кај голем дел од случаите на рак на панкреас и со децении се сметал за тешка цел за медицински третман.
Во студијата, која опфатила неколку стотици пациенти, се наведува дека новата терапија не го лекува целосно ракот, но значително го забавува неговиот развој и овозможува подолг период на контрола на болеста, со потенцијално подобар квалитет на живот. Истражувачите нагласуваат дека резултатите претставуваат важен чекор напред, но дека се потребни дополнителни клинички испитувања пред терапијата да стане широко достапна.
Ракот на панкреас и понатаму останува меѓу најсмртоносните дијагнози, со ниска стапка на преживување и често доцно откривање, што дополнително ја зголемува важноста на новите медицински истражувања во оваа област.
