Skip to content
Археолози открија остатоци од праисториски дрвен споменик во близина на Стоунхенџ, кој можеби бил ран прототип на славниот камен комплекс и место каде луѓето го следеле движењето на Сонцето пред околу 5.000 години.
Откритието е направено кај селото Булфорд, во англиската област Вилтшир, на околу пет километри од Стоунхенџ. Од некогашната градба останале само две големи јами во кои биле поставени дрвени столбови оддалечени околу 120 метри еден од друг.
Анализите покажале дека линијата меѓу столбовите била насочена кон местото каде изгревало Сонцето за време на летната краткоденица и каде заоѓало за време на зимската краткоденица.
Структурата е датирана околу 2950 година пред нашата ера, приближно 500 години пред поставувањето на најпознатите масивни камени елементи на Стоунхенџ.
Археолозите проценуваат дека столбовите биле високи меѓу три и четири метри и служеле како своевиден нишан низ кој древните жители го набљудувале појавувањето на Сонцето на хоризонтот.
„Овие луѓе биле способни да ги утврдат точките на хоризонтот каде Сонцето изгрева во средината на летото и заоѓа во средината на зимата. Тоа било пионерско достигнување“, изјави археологот Фил Хардинг, кој го предводел истражувањето.
Околу столбовите биле откриени десетици јами со животински коски, керамика, кремени алатки и јаглен. Според истражувачите, предметите покажуваат дека на локацијата се собирале поголеми групи луѓе, веројатно за сезонски гозби и религиозни обреди.
Пронајден е и редок кремен нож во форма на диск, за кој археолозите претпоставуваат дека можеби го симболизирал Сонцето.
Поставеноста на столбовите била проверена со реконструкција на древното небо, пејзажот и хоризонтот, а истражувачите утврдиле дека усогласувањето со краткодениците било прецизно во рамки од еден степен.
Научниците претпоставуваат дека едноставната дрвена конструкција можела да им служи на праисториските заедници за одбележување на годишните времиња, пред да бидат изградени поголеми и потрајни камени споменици.
Можно е луѓето што се собирале во Булфорд да биле поврзани и со изградбата на најраните делови од Стоунхенџ. Сепак, археолозите нагласуваат дека не може со сигурност да се потврди дали дрвената структура директно послужила како модел за подоцнежниот комплекс.
Откритието покажува дека областа околу Стоунхенџ имала религиозно и астрономско значење многу порано отколку што досега се претпоставувало.
