Skip to content
Топлотните бранови не влијаат еднакво на сите, но кај многу жени можат да ги засилат симптомите на предменструалниот синдром. Хормоналните промени во комбинација со високите температури често доведуваат до посилни главоболки, замор, задржување течности, промени во расположението и чувство на исцрпеност.
Еден од најважните начини за ублажување на симптомите е редовното внесување вода. Во текот на жешките денови телото губи повеќе течности преку потење, а дехидрацијата може дополнително да ги влоши главоболките, вртоглавицата и чувството на слабост. Здравствените власти препорачуваат вода да се пие во текот на целиот ден, без да се чека појавата на жед.
Исхраната исто така игра важна улога. Наместо тешки и мрсни оброци, се препорачува лесна храна богата со овошје, зеленчук и намирници што содржат магнезиум и калиум. Треба да се намали внесот на сол, бидејќи може да придонесе за дополнително задржување течности и чувство на надуеност.
Специјалистите советуваат физичката активност да се прилагоди на временските услови. Наместо вежбање во најтоплиот дел од денот, подобро е прошетките или тренинзите да се практикуваат рано наутро или навечер, кога температурите се пониски. Дури и умереното движење може да помогне во намалување на напнатоста и подобрување на расположението.
Квалитетниот сон е уште еден важен фактор. Високите ноќни температури можат да го нарушат одморот, што дополнително ги засилува симптомите на ПМС. Проветрувањето на просторијата, користењето лесна постелнина и одржувањето на пониска температура во домот можат да придонесат за подобар сон и полесно справување со непријатностите.
Доколку симптомите станат значително поизразени, траат подолго од вообичаено или се проследени со силна болка, несвестица или други сериозни тегоби, потребно е да се побара совет од матичен лекар или гинеколог. Лекарите потсетуваат дека екстремните горештини претставуваат дополнителен стрес за организмот, па грижата за здравјето е особено важна во летниот период.
