Познати жртвите од трагедијата кај Блаце

Ејуп Тернава, Џенет Тернава и Фатмире Шабани се трите лица што загинаа во тешката сообраќајна несреќа на патот од граничниот премин Блаце кон Скопје, објавија медиумите повикувајќи се на нивните семејства.

Тројцата претходно биле пријавени за исчезнати, а членовите на нивните семејства преку медиумите и социјалните мрежи побарале помош за нивно пронаоѓање. Последен пат биле видени во саботата, 18 јули, околу 22 часот во Скопје, по што со автомобил тргнале кон Косово.

Според објавените информации, две од лицата биле преземени од Меѓународниот аеродром Скопје. Тројцата продолжиле кон граничниот премин Блаце со син „мерцедес ГЛЦ“ со германски регистарски ознаки, но не пристигнале на планираната дестинација.

Министерството за внатрешни работи соопшти дека на 19 јули во 13:40 часот државјанин на Косово го пријавил исчезнувањето во Полициската станица Бит Пазар. Пријавителот навел дека последниот контакт со лицата го имал претходната вечер околу 22:15 часот, кога тие биле на скопскиот аеродром.

Истата вечер, во 22:35 часот, во СВР Скопје било пријавено превртено возило на патот Блаце – Скопје. Полициските службеници во автомобилот пронашле едно машко и две женски лица без знаци на живот, а смртта ја констатирал лекар од Итната медицинска помош.

МВР во официјалното соопштение не ги објави имињата на загинатите. Идентитетите беа објавени од медиумите врз основа на информациите и претходниот апел на семејствата за нивно пронаоѓање.

Несреќата се случила пред возилото да ја премине државната граница со Косово. Засега не е соопштено кога точно автомобилот излетал од патот, колку време останал незабележан и дали во несреќата учествувало друго возило.

Истрагата треба да ги утврди причините за превртувањето, брзината на движење, состојбата на патот и другите околности што довеле до смртта на трите лица.