Skip to content
Министерот за внатрешни работи Панче Тошковски денеска повторно ќе се соочи со пратениците, откако на дневен ред во Собранието е ставена интерпелацијата за неговата работа, поднесена од пратеничката група на Левица.
Интерпелацијата е прва точка на 106. пленарна седница, а собраниската расправа треба да ги отвори наводите на опозициската партија за начинот на кој Тошковски раководи со Министерството за внатрешни работи.
Од Левица го обвинуваат министерот за саботирање истраги, селективно постапување на полицијата, несоработка со надлежните обвинителства, непрофесионално работење и можни судири на интереси.
Интерпелацијата, според подносителите, содржи 17 точки групирани во шест области. Партијата тврди дека Министерството за внатрешни работи, наместо да функционира како професионална институција задолжена за спроведување на законите, сè повеќе се однесува како „приватна партиска полиција“.
Левица го критикува и односот на МВР кон одделни истраги поврзани со високи функционери, начинот на кадровско управување во Министерството и полициското постапување во повеќе случаи што предизвикаа реакции во јавноста.
Тошковски ги отфрла обвинувањата и интерпелацијата ја оценува како политички мотивиран обид да се забави, како што вели, расчистувањето со криминалот, корупцијата и долгогодишната неказнивост.
Министерот порача дека интерпелацијата е демократско право на опозицијата и дека нема да ја избегнува расправата во Собранието. Тој најави дека пред пратениците и јавноста ќе одговори на обвинувањата и ќе ги брани резултатите од своето работење.
Истовремено, Тошковски ја обвини Левица дека со нападите врз него се претвора во политички сојузник на СДСМ и ДУИ, иако со години се претставувала како алтернатива на овие две партии.
„Оваа трета интерпелација не е израз на грижа за државата, туку евтин политички обид да се закочи процесот на расчистување со криминалот, корупцијата и долгогодишната неказнивост“, наведе Тошковски во реакцијата објавена пред собраниската седница.
Според него, Левица сè почесто прибегнува кон политички конфронтации и создавање кризи наместо да понуди конкретни решенија и резултати.
„Не се напаѓа оној што е неважен, се напаѓа оној што менува нешто“, порача министерот, додавајќи дека конечната оценка за неговата работа ќе ја дадат граѓаните.
Ова е трета интерпелација поднесена за работата на Тошковски за помалку од две години и втора иницирана од Левица. Претходната интерпелација на партијата беше разгледувана во Собранието во април 2025 година, но не доби поддршка од мнозинството пратеници. Интерпелација за Тошковски претходно имаше поднесено и ДУИ.
Иако интерпелацијата претставува механизам за политичка контрола врз работата на министрите, евентуалното нејзино усвојување не значи автоматска смена на министерот. Таа претставува политички сигнал и основа врз која може да се побара оставка или да се отвори постапка за разрешување.
Денешната расправа се очекува да прерасне во поширок судир меѓу власта и опозицијата околу работењето на МВР, истрагите за криминал и корупција и степенот на политичко влијание врз полицијата.
Пратениците ќе треба да ги соочат конкретните наводи од интерпелацијата со одговорите на министерот, наместо расправата да остане само на меѓупартиски обвинувања за политички сојузи и прикриени интереси.
