Вокалната работилница „Бистрик“ на Биља Крстиќ со концерт во Куманово

Биља Крстиќ и десет исклучителни женски вокали вечер во 19 часот во Занаетчискиот дом во Куманово ќе одржат целовечерен концерт. Организатор на концертот на Вокалната работилница „Бистрик“ – Биља Крстиќ, е српскиот културно-информативен центар „Спона“ во чест на отворањето на нивната канцеларија во Куманово.

Како што наведуваат од Спона, вокалната работилница на Биља Крстиќ – „Бистрик“ веќе 12 години успешно работи со млади талентирани пејачи.

– Дизајнирана е уметнички да ја популаризира традиционалната музичка култура на Србија и да им даде можност на талентираните пејачи да се заљубат, да учат и да го пренесат своето знаење на идните генерации. Негуваме музика, традиција, добра атмосфера, дружење, емпатија и тимска работа со младите пејачи. Нашата работилница нуди богата концертна активност, гостувања на престижни натпревари и фестивали, учество во телевизиски емисии, музички спотови и е препознатлива по стилот, прецизната интерпретација како и специјално креираните костуми,  вели Крстиќ.

Биља Крстиќ, музички педагог и долгогодишен вокален солист на оркестарот „Бистрик“, долги години беше уредник во Радио Белград, а на музичката сцена е од 70-тите години на 20 век, најпрвин во бендовите „Сунцокрет“ и „Рани мраз“, а подоцна и како некој кој успешно гради соло кариера. Многупати е наградувана за нејзината работа, а во нејзината биографија е и музиката што ја компонираше за филмот „Зона Замфирова. Сега е актуелна со музиката од филмот „Хероите на Халиард“ во режија на Радош Бајиќ.

Канцеларијата на Спона во Скопје го прослави своето полнолетство на крајот на минатата година.