Skip to content
– Српскиот претседател Александар Вучиќ денеска на отворањето на самитот на Европската политичка унија во Гранада се сретна со украинскиот претседател Володимир Зеленски, со кого, како што рече, имал „краток и отворен разговор“ за сите важни прашања.
„Краток, отворен разговор со претседателот Зеленски за сите важни прашања“, напиша Вучиќ на својот Инстаграм профил.
Претходно во текот на денот, на маргините на самитот, Вучиќ се сретна и со премиерите на Норвешка, Луксембург и Холандија, Јонас Гар, Ксавиер Бетел и Марк Руте, со кои, како што напиша на Инстаграм, разговарал за актуелната ситуација во Косово, билатералните односи и прашања од значење за Србија.
За разговорот со Руте, тој напиша дека имал „добар состанок“ со него и дека разговарал за „ситуацијата на Косово и Метохија, продолжувањето на дијалогот меѓу Белград и Приштина, како и натамошните чекори кон европскиот пат на Србија“.
На маргините на средбата, Вучиќ разговараше и со премиерите на Велика Британија, Риши Сунак, Шпанија, Педро Санчез, Унгарија, Виктор Орбан и на Северна Македонија, Димитар Ковачевски.
Претходно, Вучиќ рече дека го очекува тежок и напорен ден, но дека се надева на напредок.
Вучиќ за новинарите во Гранада изјави дека ќе има и билатерални средби со високиот претставник на ЕУ Жозеп Борел, францускиот претседател Емануел Макрон и други официјални претставници.
На третиот самит на Европската политичка заедница, што се одржува денеска во Гранада, се собраа лидерите на 47 европски земји, меѓу кои и на Западен Балкан и највисоките претставници на ЕУ, а една од главните најавени теми е проширувањето на Европската унија.
