Skip to content
Здружението на инженери поднесе претставка до Регулаторната комисија за енергетика (РКЕ) со барање за измени во правилата за снабдување со струја, посочувајќи дека паушалното одредување на потрошувачката носи неправедно високи сметки за граѓаните и дополнителна заработка за ЕВН.
Според нивните пресметки, со ваквиот систем, ЕВН годишно инкасира околу 2 милиони евра само од паушалното пресметување на потрошената електрична енергија.
Со воведувањето на блок-тарифите во 2022 година, РКЕ наложи квартално наместо годишно отчитување на броилата. Меѓутоа, инженерите укажуваат дека во пракса често се применува паушално пресметување на потрошувачката, што може да ги внесе домаќинствата во повисоки ценовни блокови, со што нивните сметки стануваат значително повисоки.
„При само ±10% пречекорување на потрошувачката на годишно ниво, корисниците можат да бидат ставени во поскап блок, што значи значителни дополнителни трошоци, и тоа без реална основа“, велат од Здружението на инженери.
Според податоците, во Македонија има 598.632 домаќинства, а ЕВН користи 915.492 броила. Ако 15% од броилата подлежат на паушално пресметување, а 80% од домаќинствата најчесто се во вториот ценовен блок, тогаш дополнителната годишна заработувачка на ЕВН од овој метод може да достигне околу 2 милиони евра.
Инженерите бараат:
-Месечно наместо квартално отчитување на броилата, како што важи за другите категории во тарифниот систем.
-Доколку броилото не биде отчитано, ЕВН да издаде фактура од 420 денари со прикажување на 0 kWh потрошена електрична енергија, а реалната потрошувачка да се фактурира откако ќе се изврши точно отчитување.
„Со овие измени ќе се елиминираат неправедните наплати и ќе се спречи неоправданата заработувачка на ЕВН“, порачуваат од Здружението.
Сега останува на РКЕ да одговори дали ќе ги прифати овие барања и ќе стави крај на овој модел на наплата.
