Skip to content
Четири лица се во животна опасност во напад со нож во Хамбург, во Германија. Уште четиринаесет се повредени кога жена ги нападнала со нож на железничка станица во петокот (23 мај).
Сторителот е 39-годишна Германка која брзо била уапсена и не им се спротивставила на полицајците.
Нападот се случил околу 18 часот на самиот перон помеѓу двете пруги каде што многу луѓе чекале воз.
Полицијата ја испитува менталната состојба на жената, додека таблоидот „Билд“ објави дека таа имала историја на ментални болести и дека „ѝ била позната на полицијата“.
Засега, полицијата претпоставува дека нема политичка мотивација за нападот.
Забрана за ножеви
Во Хамбург претходно беше забрането носење ножеви во областа околу железничката станица, како и во јавниот превоз. Од октомври, таков закон е на сила низ целата земја – секој што ќе биде фатен со нож се соочува со парична казна.
Причината беа бројните напади со ладно оружје. Минатата година во Германија имаше 29.000 напади или закани со нож и 10.000 сериозни повреди со ова оружје.
