Skip to content
Светскиот ден на тигарот, кој се одбележува секоја година на 29 јули, има за цел да ја подигне свеста и да ја поддржи заштитата на тигрите и нивните природни живеалишта. Оваа иницијатива започна во 2010 година на Тигар Самитот во Санкт Петербург, со цел формирање глобален механизам за зачувување на овие импресивни животни.
Тигрите играат клучна улога во одржувањето на животната рамнотежа во екосистемите и влијаат позитивно на биодиверзитетот. Во 2025 година, светската кампања е посветена на мотото „Save Tigers, Save Forests, Save Life“, со нагласок на поврзаноста меѓу заштитата на тигрите, шумите и животот на планетата.
Интересни факти за тигрите:
- Тигрите се најголеми од сите мачки.
- Сибирскиот тигар е најголемиот подвид; мажјаците можат да достигнат тежина од 300 до 420 килограми и должина над 3 метри.
- Секоја тигрица има уникатен шаблон на шари, што го прави секој тигар препознатлив.
- Тигрите се врвни пливачи и често користат вода за лов и освежување, што е ретко за мачките.
За жал, во последниот век популацијата на диви тигри се намалила за 90-95%, што ги прави исклучително загрозен вид.
Во Зоолошката градина во Скопје живее една единствена претставничка на сибирскиот тигар — прекрасната Ана. Таа е симбол на заштитата на загрозените видови, со оглед на тоа дека во дивината останале помалку од 500 сибирски тигри. Секој тигар што живее во безбедно и соодветно уредено опкружување има големо значење за зачувувањето на видот.
Живеалиштето на Ана во ЗОО Скопје е едно од најубавите и најпространите, изградено според светските стандарди за добробит на животните.
Фото: Игор Паневски
Извор: Andreja Stojkovski