Skip to content
Најобилни врнежи во изминатите 24 часа се измерени во Крива Паланка, каде паднале 91 литар на квадратен метар, соопшти Управата за хидро-метеоролошки работи (УХМР). Виница следи со 68 л/м², Берово со 46, а Прилеп е четврт со 27. Најсуво било во Претор – едвај два литри.
Синоптичарите предупредуваат дека денеска времето останува променливо и нестабилно: локално се очекуваат пороен дожд, грмежи, силни налети на ветер и изолирана појава на град. Најинтензивни процеси се можни попладне, особено во планинските и источните подрачја. Максималните температури ќе се движат од 22 до 28 °C; во Скопје се прогнозира до 26 °C со услови за краткотрајно невреме во делови од котлината.
УХМР нагласува дека поради „локалниот карактер на процесите“ количината воден талог може значително да варира во радиус од само неколку километри, па на одделни локации врнежите може да бидат далеку пообилни од официјално измерените.
