Мелони го поздрави одобрувањето на проектот за изградба на мост преку Месинскиот проток, кој ќе ја поврзе Сицилија со копнениот дел

Одлуката е донесена на седницата на Комитетот за економско планирање и одржлив развој, со што проектот официјално доби зелено светло, пренесува италијанската новинска агенција АНСА.

„Денешната седница на Комитетот претставува клучна фаза во работата на оваа Влада. Комитетот денеска е повикан да го усвои конечниот план за мост преку Месинскиот Проток, со цел да се започне со изградбата во рамки на проектот, кој е еднакво импозантен колку што е и врвен од технички и инженерски аспект“, рече Мелони, според наводите на изворите.

Проектот за изградба на мостот е вреден 13,5 милијарди евра. Тој ќе биде најдолгиот висечки мост во светот, и покрај загриженоста за земјотреси, влијанија врз животната средина и заканата од мешање на мафијата.

Италијанскиот министер за транспорт Матео Салвини рече дека проектот ќе биде „двигател на развојот“ на југот на Италија. Првите активности би можеле да започнат летово, а изградбата се очекува да започне идната година.