Skip to content
По ноќната битка со огнената стихија, грчките пожарникари утрово (13 август 2025) продолжија со гаснење на повеќето активни жаришта: во Ахаија, околината на Патра во северозападен Пелопонез, на островите Закинтос и Хиос, како и во близина на Превеза. Пожарите сè уште не се ставени под целосна контрола, а според портпаролот на грчката противпожарна служба Василис Ватракојанис, во интервенциите досега се повредени 15 пожарникари.
Со првото разденување активни беа распоредени 33 воздушни средства – авиони и хеликоптери – кои паралелно со копнените екипи делуваат на сите фронтови. Властите предупредија дека денеска ќе биде „многу тежок ден“ поради најавениот многу висок ризик од нови пожари во поголем дел од земјата.
Во текот на ноќта, за делови од погодените региони беа испратени алармни пораки од бројот 112 со инструкции за евакуација на населението во непосредна близина на огнот. Според првичните информации, огнените јазици предизвикале значителна материјална штета – изгорени површини, оштетени домови и деловни објекти – чиј целосен обем ќе се проценува во наредните денови.
Големи сили се на терен и денес: според противпожарната служба, вчера и продолжено во текот на ноќта дејствуваа 4.850 пожарникари, со поддршка од механизација, локалната самоуправа и доброволци. Приоритет е стабилизирање на линиите на огнот, заштита на населените места и отворање коридори за евентуални дополнителни евакуации.
Граѓаните и туристите во засегнатите области се повикуваат да ги следат инструкциите на локалните власти, да избегнуваат непотребни патувања кон ризичните подрачја и веднаш да пријават нови огништa.
