Филипче: Нашата борба е минимална плата од 500 евра

По 15 месеци владеење на ВМРО-ДПМНЕ, економската политика на оваа влада е „најлошата во историјата“, изјави претседателот на СДСМ, д-р Венко Филипче, на денешната прес-конференција. Според него, буџетските пари наместо во мерки за граѓаните завршуваат во „лични интереси“ на власта, а „десетици милиони евра“ им се „украдени“ на граѓаните преку непостапување за цените, непокачување на платите и раст на нееднаквоста и сиромаштијата.

Филипче нагласи дека за разлика од актуелното мнозинство, СДСМ „имал и има“ порамномерни економски политики насочени кон стандардот на граѓаните и дека партијата нема да се повлече од предложените решенија за справување со инфлацијата. Тој најави дека пакетот повторно ќе биде поднесен во Собранието и го наведе како приоритети: раст на платите во сите сектори, зголемување на минималната плата на најмалку 500 евра и укинување на ДДВ за основните прехранбени производи за намалување на цените.

„Нема да отстапиме од таа битка за достоинствен живот и подобар стандард,“ порача лидерот на СДСМ, додавајќи дека владејачкото мнозинство досега не ги поддржало предлозите, но опозицијата ќе инсистира тие повторно да се најдат на дневен ред.