Skip to content
Шпанскиот премиер Педро Санчез објави низа мерки „за запирање на геноцидот во Газа“, вклучувајќи ембарго на продажба на оружје за Израел и забрана за бродови кои превезуваат гориво за израелските сили да пристапуваат до шпанските пристаништа.
„Сите овие мерки нема да бидат доволни да се запре инвазијата или воените злосторства, но се надеваме дека ќе создадат притисок врз премиерот Нетанјаху и неговата влада за да се намали страдањето на палестинското население“, изјави Санчез.
Мерките предвидуваат и законско зацврстување на ембаргото на оружје, забрана за пристап на авионите кои превезуваат воена опрема за Израел во шпанскиот воздушен простор, како и ограничување на пристапот на лица кои „директно учествуваат во геноцидот“ и на производи од нелегални населби во Газа и на Западниот Брег.
Санчес најави и зголемување на шпанската помош за Палестинците и за агенцијата на ОН за палестински бегалци (UNRWA). Тој остро го критикуваше насилството во Газа, истакнувајќи дека тоа претставува истребување на беспомошен народ и кршење на сите хуманитарни закони.
Ставот на шпанската влада, земја каде често се одржуваат пропалестински протести, предизвика напнатост со Израел, кој моментално нема амбасадор во Мадрид по признавањето на Палестина од страна на Шпанија во мај 2024 година.
