Премиерот на Шпанија бара забрана за учество на израелски спортисти на меѓународни натпревари

Премиерот на Шпанија, Педро Санчез, денес побара израелските спортисти да не учествуваат на меѓународни спортски натпревари додека трае војната во Газа.

„Зошто Русија беше протерана од спортските натпревари по инвазијата на Украина, а на Израел му е дозволено да учествува по инвазијата на Газа?“, праша Санчез на средба со пратениците на социјалистичката партија во шпанскиот парламент, пренесува Politico.

„Додека продолжува со своето варварско однесување, Израел не може да ги користи меѓународните настани за да ја уредува својата слика“, додаде премиерот.

Оваа изјава следува во време на заострување на дипломатските односи со Израел, откако Санчез ја поддржа пропалестинската демонстрација против учеството на израелскиот тим на велосипедската трка низ Шпанија.