Skip to content
Зеленски во своето видеообраќање синоќа изјави дека руските војски лансирале повеќе од 20 дронови кон енергетската инфраструктура во градот Славутич, кој е снабдуван со електрична енергија од Чернобил, нуклеарната електрана каде што во 1986 година се случи една од најголемите нуклеарни катастрофи на светот.
„Русите не можеа да не разберат дека нападот на Славутич ќе има сериозни последици по Чернобил“, изјави тој и додаде дека „Русија намерно создава закана од радијациски инциденти“.
Зеленски ја критикуваше Меѓународната агенција за атомска енергија (IAEA) и нејзиниот шеф Рафаел Гроси поради, како што тврди, слабото реагирање на потенцијалната опасност.
Руски дрон вчера ја исклучил електричната енергија во близина на Чернобил за повеќе од три часа, потврдија локалните власти.
Проблемите со Чернобил и Запорожје
Чернобил, иако формално не работи, постојано има потреба од електрична енергија за ладење на делови од постројката и за мониторирање на нивото на радијација, со цел да се спречи нуклеарна несреќа.
Електраната сè уште е исклучена од електричната мрежа. Чернобил беше погоден и во февруари минатата година, кога дрон удри во заштитниот омот и предизвика пожар, но официјалните лица изјавија дека од тогаш нивото на радијација не се зголемило.
Зеленски исто така ја критикуваше ситуацијата во нуклеарната електрана Запорожје, која исто така изгубила напојување и е исклучена од мрежата веќе повеќе од недела дена. Зеленски ја обвини Русија за тоа, додека портпаролот на Кремљ, Дмитриј Песков, тврди дека електраната била бомбардирана од страна на Украина.
Во моментов, електраната Запорожје користи резервни дизел генератори за итни случаи со цел да го охлади системот, а Меѓународната агенција за атомска енергија (IAEA) изјави дека нема непосредна опасност за околината.
Шефот на IAEA, Рафаел Гроси, изјави дека е во континуиран контакт со двете страни за да се овозможи брзо обновување на електричната мрежа на постројката.