Skip to content
Со првите сончеви зраци над главниот град, утрово официјално започна 21. издание на Виз Ер Скопскиот маратон, на кој годинава учествуваат рекордни над 14.000 тркачи од 58 земји. Атмосферата на улиците е празнична – боите на стартните броеви, насмевките и аплаузите на гледачите го претворија Скопје во вистински град на тркачи.
Трките започнаа пред Собранието, а целта за сите категории е на Плоштад Македонија. Денес трчаат маратонци, полумаратонци, штафетни тимови и учесниците на популарната Комерцијална банка 5K трка.
И времето, како по нарачка – сончево и стабилно, со идеални услови за трчање, како и вчера. Организаторите очекуваат уште едно прекрасно издание на најголемиот спортски настан во земјата и упатуваат апел до граѓаните за трпение поради привремениот сообраќаен режим што ќе трае до 14 часот.
Скопје денес трча со срце – за спорт, енергија и заедништво.
