ЕУ ги зголемува царините на челикот – автоиндустријата во паника, Британија предупредува на економска криза

Европската унија донесе одлука за зголемување на царините на челик и значително намалување на увозните квоти – потег што предизвика бурни реакции низ индустрискиот сектор, особено во Велика Британија.

Новите правила, објавени од Европската комисија, предвидуваат намалување на квотите за увоз на челик без царина за 47 проценти во споредба со 2024 година, додека царините на секој дополнителен увоз над квотата се зголемуваат од 25 на 50 проценти. Целта, според Брисел, е да се заштити европската индустрија на челик и работните места во услови на глобален пад на побарувачката и раст на евтиниот увоз, особено од Кина.

Од британската страна пристигнуваат остри предупредувања. Директорот на здружението UK Steel, Герет Стејс, изјави дека ова е „најголемата криза со која британската челична индустрија се соочила досега“. Велика Британија, која дури 80% од производството го извезува во земјите на ЕУ, може да претрпи сериозен удар доколку новите царини стапат на сила без изземање.

Дополнителна загриженост изразија и европските производители на автомобили, кои предупредуваат дека цените на челикот ќе пораснат, што може да ја забави целата автомобилска индустрија во Европа. Според Европското здружение на производители на автомобили (ACEA), драстичното ограничување на квотите и зголемувањето на царините ќе создадат „огромен притисок врз трошоците и производството“.

Европската комисија пак нагласува дека новите мерки се неопходни за да се обезбеди долгорочна одржливост и декарбонизација на индустријата. Одлуката ќе ја замени постојната заштитна мерка која истекува во јуни 2026 година, а Велика Британија веќе најави дека ќе бара исклучок од новиот режим.

Со овој потег, Европската унија се приклучува на САД и Канада, кои годинава веќе воведоа повисоки царини за челик од Кина, во обид да го спречат „прелевањето“ на евтиниот увоз на глобалниот пазар.